La Conseyera de Cultura inaugura la Feria del Llibru Infantil y Xuvenil, qu'entama güei en Villaviciosa

La Conseyera de Cultura y Turismu del Principáu, Mercedes Álvarez González, asistió esti mediudía en Villaviciosa a la inauguración del I Festival del Llibru Infantil y Xuvenil, que se prollongará hasta'l próximu domingu. L'abertura d'esti certame tamién contó cola presencia de la Director Xeneral de Política Llingüística, Consuelo Vega, el presidente de la Comarca de la Sidra, y alcalde de Cabranes, Alejandro Vega, l'alcalde de Villaviciosa, Manuel Busto Alonso, l'alcalde de Colunga, José Rogelio Pando, l'alcalde de Sariego, Javier Parjón, y la presidenta del Gremiu d'Editores d'Asturies, Marta Magadán.
 
El programa d'actos desarrollaráse ente'l xueves, 15 d'ochobre, y el domingu 18. Toles actividaes tendrán llugar na Plaza Cubierta de Villaviciosa, onde habrá un estand del Gremiu d'Editores onde s'ofrecerán les diferentes publicaciones. Los dos primeros díes prevése la visita de más de 1.000 escolinos de diferentes centros educativos de la comarca, pa los que tán preparaes actividaes como l'actuación de la cuentacuentos Olga Cuervo, un taller d'escritores, una esposición sobre'l personaxe 'Montesín' creáu pola escritora cabraniega María Xosefa Canellada, un espectáculu de maxa a cargo de José Armas El Ilusionista, y la presentación del DVD interactivu 'Colás y Xana. Vivir n'asturianu', preparáu pola Conseyería, ente otres actividaes.
 
Yá dedicaes al públicu en xeneral presentaránse dellos llibros: 'Menú de versos', d'Esther García (xueves), 'Bruxes males, bruxes bones', de Francisco Pimiango y 'Animalinos, Animalaes, Los animales y La Primavera' de Sabel Tuñón, Lurdes Álvarez y l'ilustrador Enrique Carballeira (vienres), 'Cómo te güelen los pies', de Mari Luz Pontón y 'Arroz, agua y maíz', de Berta Piñán, (sábadu).
 
Amás actuará'l sábadu, de magar les 18.00 hores, Alfredo González, cantautor ganador del Premiu al Meyor Cantar n'Asturianu en llingua asturiana, y Tejedor, el domingu a les 12.00 hores de la mañana. Otres actuaciones musicales, previstes pal sábadu y el domingu serán les de los grupos 'Doctor Centollu', 'Mosquitas Muertas', 'Bichosaurios', 'Fracaso escolar' y 'Pingüinos asesinos', toos ellos compuestos por escolares. L'actuación teatral a cargu del grupu Nun Tris completa la llista d'actividaes.