Blanco afirma que l'Estáu "nun mira pa otru llau" y que nel 2010 inagurará l'ampliación del puertu d'El Musel

|

El ministru de Fomentu, José blanco, afirmó güei que les obres d'ampliación del puertu xixonés d'El Musel tarán acabaes pal añu próximu, al tiempu que recalcó que'l Gobiernu d'España "nun mira pa otru llau", porque tien interés n'alcontrar soluciones al "problema económicu" provocáu pol incrementu de costes -de 251 milones d'euros según el PP- de les obres.
   Blanco respondió asina a una entruga urxente del PP referente a les obres d'ampliación del puertu d'El Musel en Xixón, pa que'l Goibernu esclare les circunstancies que causaron l'escesu de coste de les obres y el so correspondiente retrasu, asina como los mecanismos que se previeron pa solucionar esta situación.
   Nesta llinia, apuntó que'l "interés d'Asturies, d'España y l'interés xeneral aconseyaben acabar la obra lo primero posible". Añadió que Fomentu "esforzóse n'alcontrar una solución que garantizare la continuidá de les obres, collaborando con Asturies y l'Autoridá Portuaria", y apuntó que "esto nun ye competencia de Fomentu nin del Gobiernu d'España".
   Sobre l'incrementu de los costes, esplicó que ta motiváu pol aumentu de costes del material de cantera emplegáu, que resulta más caru pola imposibilidá de trayelu dende la mina prevista de primeres, cerca a la obra". "El mayor coste de material, uníu al gran volume necesariu pa la execución de les obres, ye la pricipal causa del incrementu, y a esto hai qu'añadir meyores técniques y los efectos que tuvieron sobre les obres los temporales del 2006 y el 2007, que provocaron la necesidá d'efectuar reparaciones que nun se reflexen como ye llóxico nel presupuestu inicial", espunxo.
PP DENUNCIA IRREGULARIDAES
   La diputada del PP Pilar Fernández Pardo, encargada de plantegar la entruga, pidió-y al ministru que nun fuere "prepotente" y díxo-y que "en mentires ye un catadráticu". Denunció les "irregularidaes cometíes y que xeneraron l'escesu de coste", recordó-y a Blanco qu'él ye l'últimu responsable de "tolo que pase", polo que pidió que se facilite al PP tola documentación pa estudidar eses supuestes irregularidaes.
   En respuesta a estos plantegamientos, Blanco destacó que tán a disposición del PP tolos espedientes, y encamentó-y que "vaya a velos". "Lo mesmo que se dixo al diputáu Isidro Fernández Rozada nel 2008, pero nun foi a ver a nengún. Tamién l'auditoría del Tribunal de Cuentes européu que nun detectó nenguna irregularidá. Dende mañana mesmu pue consultar cuando quiera tolos espedientes, asina que fáigalo y déxese yá de tantes mentires", sorrayó'l ministru.
   Blanco relcamó del PP "responsabilidá y rigor", y recalcó que tienen a la so disposición les auditoríes y "de magar agora mesmo puen investigar los espedientes". Añadió qu'él trató, d'acordies con Asturies y l'Autoridá Portuaria, que la obra acabare lo primero posible pa poder "rellanzar les autopistes de la mar, el puertu, pa xenerar más actividá económica y emplegu". Asina, convidó a la diputada a que los acompañe y adelantó que tamién la convidará a la inauguración de la obra, "que magar de lo suyo, va facese'l próximu añu".
   Fernández Pardo recalcó la necesidá de Xixón de poder contar con un puertu competititivu y denunció esos 251 millones d'euros d'escesu de coste, "lo qu'eleva'l presupuestu nun 43 por cientu, hasta 800 millones". Amás, aseguró que la UE "retiró los fondos y entamó una investigación, pero nesti momentu la oficina antifraude de la UE ta estudiando'l tema".
   "A esi escesu de coste tendremos qu'enfrentamos los asturianos pola neglixencia d'unos pocos. Pero esos pocos, mui tranquiilos, tán toos nes files del PSOE. Tendrá que recurrise a un nuevu creitu, a pesar de que tenía yá la so capacidá crediticia casi a la llende. Ye una escandalosa esviación presupuestaria, pero naide asume responsabilidaes, nin dimisiones, nin ceses por un escesu de coste de 251 millones", argumentó.

Contador Estadistiques