Por qué nun queremos la Regasificadora

La reciente entrega a Enagás de los tarrenos pa la construcción de la Regasificadora n’El Musel, val de pistoletazu de salida pa la construcción de la polémica infraestructura gasística. El proyectu véndese como una prueba ensin pega de la nueva Asturies que nos ufierta’l presidente del Principáu, pero sobre manera, preséntase como la solución perfecta a los problemes d’emplegu venceyaos a la crisis.

Cuento con qu’a lo que tamos asistiendo realmente ye a un gran engañu a la ciudadanía asturiana y xixonesa. Fardar públicamente de la supuesta creación de 1.700 puestos de trabayu como xustificación cimera pa llevar alantre la Regasificadora supón facer chantaxe con falsos argumentos a tolos que, lóxicamente, siempre van ver bien que se creen nuevos puestos de trabayu na ciudá, pero a los que nun se-yos diz tola verdá, ye dicir, que’l tipu de puestos de trabayu tamos falando, qué perspectiva llaboral ufierta la Regasificadora pal futuru, qué ye lo qu’hai tres la obra realmente y cuáles son les consecuencies negatives y los riesgos de la so construcción.
 
 La Regasificadora va xenerar los más de los puestos de trabayu prometíos durante la so construcción, que cuenten va durar dos años y mediu. Una vez en funcionamientu la instalación nun va llegar a ocupar a cien persones, cuntando colos emplegos directos ya indirectos. Y ye que si lo que queremos en Xixón y n’Asturies ye salir de la crisis a base de crear burbuxes d’emplegu venceyaes a la construcción, ¿nun taremos cayendo nel mesmu erru que tanto ta criticándose agora na construcción residencial?.
 
 Y ye qu’ehí ta’l noyu del problema. Plantegar el desarrollu, como ta faciéndose agora, enfocáu cuásique n’esclusiva al puxu del sector enerxéticu, ye un proyectu que parte d’una concepción d’Asturies como un solar a disposición d’intereses esóxenos, que van utilizanos como vertederu, batería y zona de pasu de la enerxía necesaria pa l’actividá económica que va xenerar riqueza n’otros llaos.
 
 Esti panorama llaceriosu nun ye más que’l ramu de les intenciones de la FSA-PSOE pa con Asturies. Tres la Regasificadora de Xixón van venir les centrales térmiques de combustión de gas. Nestos momentos hai diez proyectaes n’Asturies, un país al que-y sobra enerxía, nel que yá producimos cuasi’l doble de lo que consumimos.
 
 Dende Unidá Nacionalista Asturiana (UNA) pidimos-y a la ciudadanía reflexón y oposición énte esti espexismu. Dientro d’unos años tendremos en Xixón menos de cien puestos de trabayu pa producir una enerxía ensin valor añadíu dalu, dependiente del inestable mercáu del gas, y tendremos enterráu bien del nuestru patrominiu mediuambietal poniendo amás en riesgu la nuestra salú.
 
 Con esti modelu Asturies va ser cada vuelta menos atractiva pa facese con inversiones d’empreses non contaminantes polo qu’a lo meyor nun quede otra que siguir echándo-y formigón a lo que quede d’Asturies n’otru intentu desesperáu por siguir creando emplegu non sostenible, de siguir esbarrumbando’l país, pa que les zones más riques del estáu seyan tovía más riques y les más probes, más probes cada vuelta.