Pablo Quiroga y Rubén Rey, ganadores del I Certame de Microrrelatos d'una llinia de la revista Furmientu

|

Pablo Quiroga Prendes y Rubén Rey Menéndez son los ganadores 'ex aequo' del premiu del primer concursu de microrrelatos d'una llinia de llargor (80 caracteres) convocáu pola revista Furmientu y l'asociación Xareos!, en collaboración cola editorial La Cruz de Grau.
 
'Vivía ente l'angustia y l'espectáculu. Suicidóse en Cuadonga, dempués d'una misa', ye'l relatu escritu por Pablo Quiroga. 'Quería mover los llabios pero namás foi a zarrar los güeyos', foi la obra de Rubén Rey.
 
Dambos serán merecedores d'un premiu consistente nun llote de llibros y la publicación de les sos obres nel próximu númberu de la revista. Amás, concediéronse áccesits a otros nueve relatos, trés d'ellos escritos pol mesmu Quiroga: 'Namás sentila esguilaba pel árbol p'apalpiala, pero'l cielu inda taba lloñe'; 'Pal nuesu aniversariu de namoraos regale-y el GPS que la llevó a conocelu'; y 'De sópitu nun había gravedá. Esquivó'l semáforu pero comiólu la osa mayor'.
 
Otros dos áccesits fueron pa Blanca Martínez Sancho ('Güeyando al pá, el xatu dixo mui enfotáu a la vaca: -Ma, de mayor voi ser llobu') y pa Raúl García García ('Pueo resumite la vida en diez minutos. La punta d'un iceberg en mediu l'océanu'). A lo último, Jorge Fernández García, foi merecedor d'esta reconocencia por otres cuatro creaciones: 'Pa cuando algamó'l valor pa cuntá-ylo, ella yá se durmiere' (Tituláu 'Secretu), 'Decatóse yá ensin remediu de que la mayor arma de destrucción taba na so mente' (tituláu 'Namái una idea'), 'Dicíen-y: esfruta la vida. Pero naide-y dixo cómo. Enteróse a un añu de morrer' (tituláu 'Carpe Diem), y 'Alquílase compañeru de pisu silenciosu', (tituláu 'Alquileres').
 
   Amás, decidióse la publicación d'otros ocho relatos non ganadores, pero que llamaron l'atención del xuráu. El mesmu tuvo compuestu por  Xuan Xosé Sánchez Vicente, el xerente d'ediciones La Cruz de Grau, Cesar García Santiago, la filóloga y escritora Laura Marcos, l'escritor Benxa Pérez, y el director de la revista Formientu, Inaciu Galán.
 
   La entrega de premios fairáse demientres la presentación del próximu númberu de la revista Furmientu, que tendrá llugar demientres el mes d'ochobre.

Contador Estadistiques