Una delegación española pidirá'l derechu d'autodetermín pal Sahara nos debates sobre esti tema na ONU

Una delegación española formada por representantes de dellos parlamentos autonómicos y asociaciones solidaries col Sahara Occidental participará  nos alderiques de la Comisión de Política Especial y Descolonización (IV Comisión) de l'Asamblea Xeneral de la ONU, nos que se tratará'l tema del autodetermín de l'antigua colonia espñola, según informó güei la Federación Estatal d'Instituciones Solidaries col Pueblu Saharaui (Fedissah).
 
La delegación tará formada por Rosario García Díaz, diputada del parlamentu d'Estremadura y miembru de la Fundación Sáhara Occidental; Miquel Carrillo Giralt, diputáu del Parlamentu catalán; Jesús Loza Aguirre, diputáu del parlamentu vascu; Javier Aspuru Oribe, diputáu foral de Mocedá y Promoción Social de la Diputáción Foral d'Álava; Teresa Táboas Veleiro, diputada del Parlamentu de Galicia; Felipe Briones Vives, secretariu de l'Asociación Internacional de Xuristes pol Sahara Occidental (IAJWS); y Antonio López Ortiz, secretariu de Fesissah.
 
Los debates celebraránse ente mañana martes y el miércoles 7 d'ochobre, y nellos trataráse "un añu más el procesu inacabáu de descolonización del Sáhara Occidental, territoriu non autónomu del qu'España sigue siendo potencia y autoridá alministradora, según Naciones Uníes", afirmó Fedissah nun comunicáu.
 
"L'oxetivu de la participación española ye defender el derechu al autodetermín del pueblu saharaui y denunciar l'estancamientu del Plan de Paz, por mor de la torga permanente de Marruecos al so desarrollu", prosiguió.
 
La delegación, indicó la Federación, pondrá l'acentu en "condenar y denunciar al Gobiernu de Marruecos pola brutal represión que ta exerciendo contra la población saharaui nel Sáhara Occidental, ocupáu illegalmente por Marruecos", asina como'l tratu dispensáu a los presos políticos y actividates saharauis "que tán sometíos a tou tipu de malos tratos y tortures".
 
"Actuando asina, Marruecos ta violando toles convenciones internacionales sobre Derechos Humanos que firmó, como denunciaron les más prestixoses organizaciones de defensa de los Derechos Humanos, incluyíes les del propiu Marruecos", denunció Fedissah.
 
Demientres la so presencia en Nueva York, la delegación aprovechará pa caltener delles entrevistes con embaxadores acreditaos en Naciones Uníes, n'especial col embaxador d'España ante la ONU, Juan Antonio Yáñez, "al que se-y solicitó formalmente un conceyu", acabó'l comunicáu.