Cada asturianu pagará unos 513 euros más pola subida d'impuestos, según Gestha

Los Técnicos del Ministeriu de Facienda (Gestha) estimaron güei que la subida fiscal acabante d'anunciar el Gobiernu dexará sentise nel bolsiellu de los contribuyentes asturianos, que tendrán que desembolsar una media de 513 euros más al añu, según informó Gestha nuna nota prensa.
   D'acordies coles estimaciones realizaes por esti colectivu, esta comunidá aportará una recaudación adicional de 207 millones d'euros a les arques del Estáu, lo que supón el 1,89 por cientu de los ingresos estres qu'algamará l'Estáu pola refomra fiscal (unos 10.950 millones).
   Gestha --qu'analiza de  manera individualizada l'impactu de la subida de los distintos impuestos-- consideró que les midíes fiscales incluyíes dientro del Proyectu de Llei de los Presupuestos Xenerales del Estáu pal 2010 tendrán un impactu "reducíu" y nun cubrirán el "furacu" del déficiti públicu por mor de la so escasa potencia recaudatoria.
   En referencia a les rentes del aforru, los Técnicos de Facienda calcularon que sobre'l 4,44 por cientu de los contribuyentes asturianos que ganen más de 60.000 euros añales, pagarán el 78,57 por cientu de la subida del tipu de gravame del 18 por cientu, al 19 por cientu, anunciáu pol Gobiernu pa los primeros 6.000 euros y, el restu, al 21 por cientu. En total, Asturies recaudará unos 17 millones añales estra por esti conceptu.
   Per otru llau, Gestha consideró que la supresión de la deducción de 400 euros nel IRPF afectará al 96,17 por cientu de los asturianos, que son los que ganen ente 9.000 y 60.000 euros. Los técnicos calculen que la eliminación d'esta midida, anunciada en plena campaña electoral pol presidente de Zapatero, supondrá una recaudación estra de 157 millones d'euros n'Asturies.
   N'otru orde, los Tecnicos de Facienda estimen que la baxada de cinco puntos del Impuestu de Sociedaes y la so equivalente pa los autónomos nun beneficiará en gran midida al sector empresarial asturianu, pol actual contestu económicu que ta dificultando l'algame de beneficios y, más tovía, el caltenimientu del emplegu.
   Por esti motivu, Gestha propón que l'aplicación d'esta midida temporal s'aplace nel tiempu, de manera  que les empreses puean deducise esti 5 por cientu (non nesti exerciciu) sinón nos exercicios nos que se recupere'l nivel de los beneiicos ordinarios, premiando asina l'esfuerzu realizáu por aquelles empreses más responsables socialmente en caltener y crear emplegu.
   N'Asturies, Gestha calcula que sobre 8.160 pequeñes empreses podíen acoyese, de primeres, a esta midida por cumplir colos requisitos de facturación (hasta cinco millones d'euros) y plantiya (25 emplegaos) fixaos pol Gobiernu.
   D'esta manera, la reducción del Impuestu de Sociedaes supondrá un aforru fiscal potencial de diez millones d'euros pa les pequeñes empreses asturianes, lo que representa economizar una media d'unos 1.268 euros por empresa.