El Parlamentu asturianu pide por unanimidá que se retiren les torres d'alta tensión del trazáu Lada-Velilla

Los trés grupos con representación na Xunta Xeneral del Pricipáu d'Asturies (XXPA), PSOE, PP y IU-BA-Verdes, aprobaron güei por unanimidá una proposición non de llei presentada polos 'populares' polo que se pide al Gobiernu del Principáu que se dirixa al Executivu estatal pa qu'exixa a Rede Eléctrica Española (REE) que desmonte y retire les torres d'alta tensión del trazáu de la llinia Lada (Asturies) - Velilla (Palencia).
   El diputáu del PP, Marcial González, defendió la moción y señaló que la Unión Europea "paralizó" el trazáu que se pretendía executar, y que poro nun tien sen que permanzan eses torres. Esplicó que les lleven colocaes dende hai vente años, ente otros llugares, nel espaciu protexíu del Parque Natural de Redes.
   Pela so parte, el voceru de IU-BA-Verdes, Jesús Iglesias, espresó la conformidá cola proposición non de llei plantegada. "Una vez que la racionalidá s'impunxo, nun tien sen caltener les torres", señaló Iglesias, que llamentó que nun se produxere la retirada enantes per parte de REE. Reconoció la importancia de les llinies d'evacuación enerxética p'Asturies, pero reclamó respetu pal mediu ambiente.
   Per parte del PSOE, intervino Benigno Enríquez, que tentó de que'l PP aceptare una enmienda na que s'añadía al testu que yera necesario entainar l'autorización de la nueva llinia d'alta tensión Lada-Velilla. La enmienda refugóla'l PP, pero'l PSOE acabó votando a favor de la proposición.
   Enríquez reconoció que nun tien sen caltener les torres na zona, dao que se ta a la espera de la tramitación d'un nuevu trazáu. Nesti puntu, recordó la importancia que tienen p'Asturies les llinies d'evacuación enerxétiques, como Lada-Velilla o Soto-Penagos, pal futuru de les centrales térmiques, les enerxíes renovables, les plantes de cilcu combináu o la regasificadora.
   A lo último, Enríquez dixo que n'Asturies existen empreses que son grandes consumidores d'enerxía y pa la que ye necesario solucionar cualquier problema d'abastecimientu lo primero posible. "Lo contrario podía provocar desllocalizaciones", alvirtió.
   N'otru orde de coses, la Xunta Xeneral del Principáu refugó güei, colos votos del PSOE y IU-BA-Verdes una proposición non de llei del PP que pidía la inmediata inauguración y puesta en serviciu de la casa de Cultura de Cangas del Narcea.