El Plenu d'Avilés acuerda axudicar, col votu a la escontra d'IU, la coxestión del agua a Aquagest

El Plenu del Ayuntamientu d'Avilés axudicó a Aquagest el concursu que s'abrió hai nueve meses pa buscar un sociu priváu que coxestione'l serviciu del agua xunto a l'Alministración llocal. Tolos partíos políticos apoyaron l'informe, ellaboráu polos técnicos municipales, que señalaba esta ufierta como la más favorable, cola salvedá de los dos conceyales d'IU, que tán a la escontra del modelu de xestión elixíu.

   Pa que la decisión seya firme, tovía ha presentase a un periodu d'esposición pública y a una nueva aprobación nel plenu, según indicó l'alcaldesa, Pilar Varela. La empresa, Aquaguest abonará un canon de 37 millones d'euros, motivu que-y permitió facese col concursu, dada la superioridá que rexistró con respeuto a les otres empreses interesaes: Aqualia y Acciona Agua. Presentó una ufierta mui superior, lo que fizo que la puntuación algamada a lo último, incluyendo tamién los puntos rellacionaos con cuestiones técniques, fuera la más alta.

   Tovía asina, el conceyal de Recursos Urbanos, Luis Gramón Fernández Huerga, quiso restar importancia al canon y indicó que la "razón de que ganara Aquagest ye que ye la empresa que vien a ganar menos dineru". Según indicó, ta previsto qu'algame un beneficiu de 4,53% cuando les otres empreses aspiraben al 10%. L'edil socialista indicó tamién que nesti momentu l'Ayuntamientu dispón de 18 trabayadores pa trabayar nel departamentu d'agües, mientres que l'axudicataria tien previsto contratar al doble de personal.

   El voceru municipal del PP, Constantino Álvarez, reclamó demientres la sesión plenaria a los dos conceyales d'IU que pidieren disculpes a los ediles qu'apoyaron nun principiu la creación d'una empresa mista pa facese cargu d'esti serviciu. Nel últimu plenu del mes pasáu, la coalición denunciare la intención d'axudicar esti serviciu a Aqualia y a lo último nun foi asina.

   Pela so parte, el PSOE reclamó al so sociu de gobiernu qu'esi perdón lo ficiere llegar, "casa por casa a los 17.000 avilesinos que firmaron reclamando un referendu que se mantenía sobre dos supuestos falsos". Fernández Huerga insistió, una vez más, en que la creación de la sociedá mista nun va suponer nin la privatización del serviciu nin l'encarecimientu del recibu del agua.