El Grupu de Teatru CP Felechosa, de xira con 'Bon appétit..., o non...'

La obra llevó dos premios nel X Certame de Teatru Escolar n'Asturiano y Gallego-asturiano.

El Grupu de Teatru Colexu Públicu Felechosa, formáu poles escolines y escolinos de quintu y sestu de Primaria, ta de xira un añu más cola obra que prepara pa esti concursu, nel que nun ye sorpresa que lleve merecimientos. Nesta ocasión foi al Meyor Testu Orixinal por 'Bon appétit..., o non', escrita y dirixida pola maestra Laura Prieto, y a la Meyor Actriz, pa Catalina pol so papel de Matilde, na estaya de Teatru, y dientu d'ésta, de Primaria.

Depués de llevar la función a Morea en sesión doble, esta tarde va participar na VII Gala de Teatru Escolar que se celebra en Mieres con entrada a la voluntá. Va principiar a les 19 hores nel Auditoriu Teodoro Cuesta y el públicu tamién va poder disfrutar de 'Esta muerta ta mui viva', del Grupu de Teatru CP Returbiu, y de 'De Turón a Eurovisión', del Grupu de Teatru CP de Viḷḷapindi.

Trés representaciones más

La xira con 'Bon appétit..., o non' tien programaes trés representaciones más. La siguiente va ser el vienres vinientes en Turón, al meudía pa los colexos y a les 18 hores pal públicu xeneral nel Teatru La Salle; el 7 de xunu en Caborana a les 19.30 hores na Xunta d'Iniciatives; y el 19 en Felechosa a les 11.30 hores nel salón d'actos de la Residencia Montepío.