¿Por qué foi tan importante Xosé Álvarez Fernández 'Pin'?

Repasamos la trayeutoria del escritor de Cigüedres, al que va tar dedicada la XLVI Selmana de les Lletres Asturianes.

Xosé Álvarez Fernández 'Pin' ye ún de los escritores más reconocíos de la lliteratura de la diáspora. “Dende’l país arxentín”, onde emigro xunto a la so madre, “caltuvo una rellación sobre manera emocional con Asturies y la so lliteratura, y dende la capital española siguió nutriendo la lliteratura infantil en llingua asturiana y vinculóse a asociaciones bien actives na defensa de les llingües y cultura d’Asturies, yá que formó parte de Conceyu d’Asturies en Madrid”, que llegó a presidir, rescamplaron dende'l Gobiernu.

Nacíu nel añu 1948 nel conceyu de Miranda, crució’l charcu de críu y fixo’l camín inversu en direición a Castilla de rapaz. Trabayador de los coches-cama de RENFE y, más alantre, como emplegáu de banca, adelantóse cuasi una década al Surdimientu, del que ye consideráu’l primer narador realista, escribiendo’l so primer cuentu n’asturianu nel 1966, con 18 años.

Nel 1970 la revista ‘Asturias Semanal’ asoléya-y una carta n’asturianu, la primera de la revista onde cuatro años más tarde diba nacer Conceyu Bable. Tamién gana’l primer concursu de cuentos en llingua asturiana que convocó’l Muséu del Pueblu d’Asturies en Xixón nel 1973, na etapa de Luis Argüelles como direutor, por iniciativa de l’Asociación d’Amigos del Bable.

La importancia del Conceyu d’Asturies en Madrid

La Facultá de Ciencies de la Información de Madrid ye’l llugar onde va axuntar un piñu d’asturianos que terminaríen formando nel 1976 l’asociación Conceyu d’Asturies en Madrid, una organización clave pa entender la evolución del asturianismu y el procesu de recuperación llingüística, que llegó a tener local propiu en Fuencarral, espublizó dos revistes (‘Restallu’ y ‘El Picatueru’) y convocó dellos concursos de poesía y narración. Neto, Fonsu Velázquez, Xuan Cándano, Xelu Neira, Xicu Yepes, Xulio Llaneza, Pepa Fernández, Xulio Ramos, Xosé María Rodríguez, Roberto González-Quevedo, Javier Cuartas, Carme Tineo, Celia Cardo, Mario Bango, Antonio Palicio, Cándida Domínguez, Maestru Casanova, Alfredo Huergo, David Rivas, Llarina Rodríguez son dalgunos de les persones que participaron nesti coleutivu.

‘El bable de Xuanín ia outrus cuentus’ foi’l so primer llibru, editáu en Madrid nel 1980, nel que busca una xuntanza cola lliteratura oral tradicional al través de relatos onde’l mundu de referencia ye l’occidente rural de la so infancia y de la so memoria, a los que siguieron ‘Fíos de naide’ (1981), ‘Cuentos de nós’ (1983) y ‘Los tres reis (cunuciendo los nuesus animales)’ (1983), ún de los primeros llibros infantiles n’asturianu. Miembru correspondiente de l’Academia de la Llingua Asturiana dende la so creación, esta institución espublizó-y nel 2011 el ‘Vocabulariu de Miranda’, el trabayu de toa una vida de recopilación de pallabres y espresiones del so conceyu de nacencia.

D’igual forma, tamién dexó fechos trabayos de recoyida de refranes. Pin recibió’l ‘Urogallo de Bronce’ na categoría lliteraria del Centro Asturianu de Madrid nel 1990 y dio nome a un concursu de cuentos n’asturianu que convocaba esi mesmu centru nel entamu del sieglu XXI.

Hacia l’añu 2000 regresó al activismu llingüísticu y cultural, cola idea de volver a poner en marcha’l Conceyu d’Asturies en Madrid, pero morría de sópitu por un infartu en Cigüedres, onde pasaba unos díes, nel 2001. Amás de pola so faceta como escritor, Pin rescampló pola so importante xera de difusión de la cultura y la llingua asturianes na capital estatal y otros llabores rellativos a la edición de llibros, propuestes normalizadores del idioma y convocatoria de concursos lliterarios dende’l Conceyu d’Asturies en Madrid.

Nel terrén políticu, yera un nacionalista d'izquierdes convencíu, comprometiéndose nos proyeutos políticos que nacieren mientres la década de los 80.

Na semeya, Pin de mozu.