El ministeriu tamién inclúi al asturianu nes ayudes de promoción de la llectura y la industria editorial

Asoleyáronse les convocatories de trés llinies d’ayuda del Ministeriu de Cultura con presencia del asturianu. A les subvenciones de creación lliteraria yá anunciaes por Ernest Urtasun, añádese la inclusión tamién per primer vez del idioma nestes otres dos categoríes.

El testu “les obres han tar escrites en cualquiera de les llingües oficiales españoles, asina como aquelles con reconocimientu xurídicu nos estatutos d’autonomía”, casu del asturianu o l’aragonés, incorpórase a la resolución de la convocatoria pa la creación lliteraria, términos mui asemeyaos na qu’apaez na de promoción de la llectura y les lletres españoles. Entrambes, y tamién na ayuda pa entidaes ensin ánimu d’arriquecimientu que promueven y fortalecen la industria editorial, inclúise na introducción una referencia al respeuto.

“La Constitución Española, nel so artículu 3.2, afita que’l castellanu ye la llingua española oficial del Estáu y que les demás llingües serán tamién oficiales nes respeutives comunidaes autónomas d’alcuerdu colos sos estatutos. D’igual forma, nel so artículu 3.3, reconoz que la riqueza de les distintes modalidaes llingüístiques d’España ye un patrimoniu cultural que será oxetu d’especial respetu y proteición. Al amparu d’esti marcu constitucional, consideróse pertinente que puedan acceder a esta ayuda tanto los proyeutos a desendolcar en castellanu, como los proyeutos en cualesquier de las llingües oficiales d’España, asina como aquelles con reconocimientu xurídicu nos estatutos d’autonomía de les comunidaes autónomes”, redautóse nos trés documentos.

D’esta forma l’asturianu va incorporándose, poco a poco, a les diferentes subvenciones que s’entamen dende’l Ministeriu de Cultura. L’anterior llexislatura yá entrara l’idioma nes de traducción y en delles iniciatives depués de la insistencia del Gobiernu d’Asturies al traviés de Política Llingüística, y cola llegada d’Urtasun la presencia de la llingua asturiana entama a normalizase.

Na semeya, Ana Vanessa Gutiérrez, conseyera de Cultura, Política Llingüística y Deporte, y Urtasun, en febreru n'Avilés, onde se celebró la Conferencia Sectorial de Cultura.