Segunda edición de ‘¿Cuála ye?’: “Qu’haya xuegos de mesa n’asturianu ye un fechu de normalización”

Yá ta a la venta la segunda edición de ‘¿Cuála ye?’, el xuegu d’entrugues n’asturianu sobre temes d’Asturies pa xente adulto asoleyáu por Acuto Xuegos. La primer edición, espublizada nel 2020, escosóse en 3 meses, y la preventa d’ésta algamó los 130 exemplares.

“Nestos años recibimos una demanda constante de xente y por fin pudimos sacar una segunda edición”, celebra Félix Fernández Rodríguez, responsable d’Acuto Xuegos. “Nel so día foi una sopresa mui grande. Nun esperábamos tanto”, añade al tiempu que recuerda que la primer edición asoleyóse por una campaña de micromecenalgu na rede “y llegó l’andanciu a la metá del mesmu; metiéronnos en casa a toos”.

Al final, “salió bien, pero foi una circunstancia tan especial que nun sabíamos qué diba pasar y tiramos por una tirada curtia. N’otros circunstacies fixéramos una tirada mayor na primer edición. Foron 300 exemplares y volaron”, recuerda.

Pa esta segunda edición apostóse por sacar 500 exemplares, de los que 130 yá tán vendíos por una preventa entamada a lo último del añu pasáu. “Una segunda edición ye un riesgu mui grande y valió d’ayuda pa facer una previsión de la tirada que pudieramos sacar”, esplica.

En total yá hai nos llares asturianos 430 ‘¿Cuála ye?’, una cifra qu’amuesa la demanda esistente de xuegos de mesa n’asturianu, tanto pa la reciella como p’adultos. “Yera dalgo que la xente pidía: los xuegos más populares del mercáu en versión n’asturianu. Pero claro, nun ye fácil publicar, y menos ensin ayudes”, rescampla Fernández Rodríguez.

“En toles cases toos tuvimos xuegos de mesa, si nun ye na nuestra, na de los nuestros padres; o los tendremos cuando tengamos fíos o nietos. Los xuegos de mesa siempre van tar ehí y qu’haya la posibilidá de que los haya n’asturianu ye un fechu de normalización mui bona. Hai cierta demanda, mercáu pa sacar xuegos n’asturianu”, considera.

Correición d’errores

Esta edición de ‘¿Cuála ye?’ ye idéntica a la orixinal, con un total de 900 entrugues de seis temátiques: historia, cultura, llingua y lliteratura, ciencies y naturaleza, deportes y entretenimientu, y xeografía y conceyos. Una revisión fonda permitió a Acuto Xuegos a iguar dalgún error detectáu.

Nel mes de mayu va poder mercase’l xuegu con una promoción de llanzamientu na tienda en llinia d’Acuto Xuegos a un preciu de 45 euros. Tamién nel puestu que la empresa va poner el día 18 na Feria de Primavera de Güeñu y na LLABShop de Xixón el 25 y el 26.