Barbón va convocar na segunda quincena de mayu la xunta sobre la oficialidá

Los grupos parllamentarios van recibir esti mesmu llunes la invitación “pa un aconceyamientu conxuntu que va ser na segunda quincena de mayu”. Adrián Barbón va convidar a participar nesa xunta al presidente de l’Academia de la Llingua Asturiana, Xosé Antón González Riaño.

“Voi llevalo hasta’l final”, aseguró’l presidente del país, sobre la votación de la oficialidá na Xunta Xeneral mientres una visita a la esposición ‘Conceyu Bable nel so tiempu. L’Asturies de va mediu sieglu’ na que tuvo acompañada por Conchi Paredes, direutora del Archivu Histórica d’Asturies, que l’acueye, y el propiu González Riaño. “Ési foi l’error que cometí la llexislatura pasada, equivóqueme. Creo que debí llevalo hasta l’últimu estremu, que teníemos que votalo na Xunta, y arrepiéntome”, confesó emplegando l’asturianu.

Tamién de que “llevé munchos temes pa negociar”, lo que consideró d’igual forma “un error” porque “al final caún atopó una disculpa, como diría la mio güela, una caxigalina, pa dicir que non y al final lo que pasó ye que se bloquió. Y cuando vi’l bloquéu nun lo llevé a votación y ehí equivoquéme. Esta vez nun va pasar asina”.

Si naquella ocasión sí daben los númberos –27 diputaos contando’l de Foro– nesta son 24, a 3 de los necesarios pa la reforma del Estatutu d’Autonomía, lo que fai indispensable’l votu favoratible del PP. “La reflexón que faigo al Partido Popular n’Asturies ye que faigan un exerciciu de responsabilidá con Asturies y camuden la so posición histórica, igual que la camudó la FSA”, comentó.

Al respeuto, apuntó qu’Álvaro Queipo, presidente popular, “presume muncho de que quier facer como fai’l PP gallegu” y recordó que “el PP gallegu nunca tuvo problema nengún col tema identitariu y llingüísticu”.

Reflexón na nueche del Día de les Lletres Asturianes

“Asistí, como tolos grupos parllamentarios que creemos nel Estáu autonómicu, n’Asturies, al actu de les Lletres, nel que’l presidente de l’Academia pidíame valentía y que, sobre manera, nun dexara morrer esti alderique”, repasó Barbón sobre’l motivu que-y llevó a tomar esta decisión de dar un pasu alantre pa negociar de manera conxunta la oficialidá asturianu y el gallego-asturiano. “Reflexóne aquella nueche, nun dormí, y depués sentí’l clamor ciudadanu de la manifestación del sábadu reivindicando que moviéramos ficha, y creo qu’en política un presidente tien que liderar”.

“Voi llevar una propuesta d’artículu 4 y non sólo voi llevala ellí. Voi intentar pesllar un alcuerdu con tolos grupos que quieran pa que, d’alcuerdu a esi alcuerdu, presentar una proposición de llei a la Xunta Xeneral de reforma del Estatutu d’Autonomía esclusivamente del artículu 4 qu’espero que sume la mayoría necesaria pa la toma en consideración, que nun ye una mayoría reforciada, pero que llueu requier d’una mayoría reforciada pa, depués de la comisión parllamentaria que trabaye nesi artículu 4, llevalo nuevamente a Plenu”, avanzó’l socialista, que recordó que “equí nun val l’astención” polo que “animo a que tolos grupos contribuyan a un consensu”.

Agradecimientu a Conceyu Bable

Sobre la esposición señaló que cuando s’enteró de la so organización “automáticamente apuntéla neses visites obligaes”. “Nunca podremos agradecer lo suficiente a Conceyu Bable lo que significaron p’Asturies na recuperación de la identidá cultura, el nuesu patrimoniu, la nuesa propia identidá como pueblu, y sobre manera, lo que contribuyeron a la reivindicación de l’autonomía política, que güei disfrutamos y defendemos”, añadió.

Tamién rescampló’l so deséu de ver la primer bandera d’Asturies, espuesta na muestra, “de tiempos de la Diputación Provincial, a partir d’un informe qu’encargó la propia Diputación Provincial”. “Ye una esposición que pa los amantes de la historia d’Asturies, paga la pena”, concluyó.

Na semeya, Paredes, Barbón, González Riaño y Pablo León, direutor xeneral de Patrimoniu Cultural, esta mañana na visita a la esposición ‘Conceyu Bable nel so tiempu. L’Asturies de va mediu sieglu’.