“La clas política asturiana va con 50 años de retrasu pa col asturianismu”, afirma Rodríguez Medina

Recibíu como académicu correspondiente nel añu 2020 nun actu reducíu pola pandemia que se celebró na Aula Magna de la Universidá d’Uviéu, Pablo Rodríguez Medina dirixóse esti XLV Día de les Lletres Asturianes a un auditoriu mayor. L’Academia de la Llingua Asturiana (ALLA) acoyólu agora como académicu de númberu.

Cola lletra de ‘Per cuatro palos que di’, primer cantar de ‘Cancios d’un país’ de Nuberu, “la cinta que sentía nel pisu en que vivíemos a la renta en La Vega, arrancó la so intervención l’escritor. “Dacuando en vez marchaba la lluz de la Ercoa: buscábemos una botella y prendíemos una vela. Ente que volvía, mio pá contábanos histories. Atentu a les pallabres que facíen baillar la llama, recobré un mundu qu’años dempués fadría míu”, rellató.

“Va pa tres años y mediu que l’Academia de la Llingua Asturiana me nomó académicu correspondiente. Dicía yo daquella qu’ún nun escueye la llingua na que naz, pero sí pue escoyer el compromisu. Pero, ¿y la conciencia? ¿Cuándo nos naz la conciencia? La conciencia de qué falamos, conciencia de que cada pallabra de cualisquier llingua ye una herencia, una llave que nos abre al aire d’otru tiempu”, esplicó.

“Per munchos años, yo nun tuvi esa conciencia. ¿En qué falaba a la hora del recréu? ¿Por qué nun eché de menos l’asturianu nos llibros de la escuela? ¿Por qué-y llamaba en naturales ‘ciervo volante’ a la vacalloria? Pa entós el trabayu de Conceyu Bable prendía: había una Academia de la Llingua Asturiana, sonaba música n’asturianu y de poco en poco una segunda xeneración del surdimientu tomaba’l relevu de la Primera, que tan arrimao lo tuviere…”.

Rodríguez Medina señaló darréu que “coles primeres clases d’asturianu garré conciencia de qu’había un mundu del que naide nun falaba. Un mundu qu’entá nos siguen negando. Un mundu que sentía y siento míu. Nes semeyes d’entós les pancartes traen les conseñes d’anguaño: ‘Nel Estatutu d’Autonomía, bable llingua oficial’”.

“La clas política asturiana va con cincuenta años de retrasu pa col asturianismu. Porque cincuenta años dempués aquelles manes xorrecíes, camudaron nun ríu. L’asturianismu costruyó esti pequeñu milagru: una lliteratura propia con calter singular y calidá; recoyóse y actualizóse la tradición oral del pueblu; la música n’asturianu ye, al empar, otru finxu ensin el que nun se ye a desplicar el panorama cultural asturianu d’esti mediu sieglu. Esta llena ye imparable”, aseguró’l tamién filólogu, qu’añadió que “garrar conciencia ye decatase de qu’escribir, falar n’asturianu ye un actu cívicu, un actu de resistencia”.

Enfotu y responsabilidá

“Agora, académicos y académiques, abrísme la institución pa qu’entre nella a trabayar col anováu enfotu de siempre y más responsabilidá que nunca. Nun sabéis qué honor que me reconozan aquellos nomes que tanto almiro pol compromisu y pol rigor científicu de les sos espublizaciones. Trabayaré pa que futuros académicos y académiques sientan l’honor que me percuerre al entrar nesta institución”, prometió Rodríguez Medina.

Por último, quixo compartir la so allegría cola xente más nuevo: “a quien escribe, a quien llee, a quien recueye les pallabres que-y ufren, a quien canta, a quien apuesta con tantu ringorrangu y puru remangu pola nuestra llingua”. Tamién solicitó facelo “con aquellos a los que, como’l mio amigu Luis Arias Argüelles Meres, la lluz de la vida yá se-yos sumió pero dexaron equí’l testigu de les sos pallabres”.

“Diz Elvira Laruelo nún de los sos poemes: Si un día s’apagara / definitivamente/ esti marmullu débil / que ye la mio voz / debería deprender a nomar otra vuelta / tolo que m’importa. Con conciencia digo que nun dubio de que yo diba nomalo n’asturianu”, finó.