“Bona parte de la dignidá que l’asturianu conquistó estos años tuvo l’arranque na xera de Conceyu Bable”, afirma Álvarez

El llunes entama la XLV Selmana de les Lletres Asturies, con un ampliu programa d’actividaes centraes nel llabor de Conceyu Bable nel cincuentenu aniversariu de la so fundación. El coordinador d’esta edición foi Francisco ‘Paco’ Álvarez, que tuvo una conversación con Asturies.com sobre la importancia d’esti coleutivu y los diferentes actos.

A les 12 hores nel salón d’actos de la Biblioteca d’Asturies va celebrase l’actu inaugural de la gran fiesta de la nuesa lliteratura. Una cita na que va proyeutase’l documental ‘Conceyu Bable: entamar los llabores de la casa’, obra de Goxe Producciones, que va emitise tamién en TPA a lo llargo de la selmana.

“Siéntome mui honráu”, confiesa’l coordinador de la Selmana de les Lletres Asturianes, “préstame enforma porque esti añu ye un protagonismu colectivu, asociáu a dos númberos, el 45 y 50”. “Ye un homenaxe bien necesario por tol llabor que fixo esta xente, los conceyeros, conceyeres o conceyistes, como los llamaben daquella. Y por suerte siguen vivos y pueden disfrutar d’esti homenaxe colectivu, porque a veces los homenaxes lleguen tarde, non en vida, sobre manera homenaxees a dalgún escritor concretamente”, añade’l periodista xixonés.

Álvarez refierse a Conceyu Bable como “un colectivu que foi determinante pal futuru de la llingua asturiana nun momentu tamién determinante pal futuru d’Asturies, los años del tardofranquismu y la Transición, porque hai que recordar que Conceyu Bable echa a andar dientro de la dictadura franquista. Tamos falando del añu 1974 como fecha fundacional de Conceyu Bable, en xunetu la entrevista que salió na entrevista ‘Asturias Semanal’ que fixo Melchor Fernández a Xuan Xosé Sánchez Vicente, Xosé Lluis García Arias y Lluis Xabel Álvarez, que ye’l fitu fundacional de Conceyu Bable. Tuvo muncho méritu’l que naquelles circunstancies l’asturianismu sacara les pates del tiestu, pa reivindicar un idioma y una cultura qu’históricamente tuvieron nengunaes, pero que nel franquismu tuvieron nel momentu peor de la so historia”.

Tresversalidá de los actos

Dende va unos meses el tamién reconocíu escritor vien trabayando na coordinación de les actividaes de la Selmana de les Lletres Asturianes xunto a “una persona que tuvo trabayando na solombra, que ye Luis Casteleiro, filólogu y funcionaria de la Direición Xeneral d’Aición Cultural y Normalización Llingüítica, que tuvo echándome un gabitu en tou esti procesu. Tien abonda esperiencia y fiximos un trabayu coordináu”.

“Dalgo que me presta enforma ye l’enfoque, que nun ye méritu míu, ye una plantegamientu de la propia conseyería, que ye’l toque tresversal qu’hai esti añu nos actos, implicando non sólo a ámbitos propios del asturianismu, sinón tamién a otres instituciones, entidaes, venceyaes tamién a l’Alministración autonómica d’una manera o otra, como la Biblioteca d’El Fontán, el Muséu de Belles Artes d’Asturies, que ye una cosa interesante: sacar un poco la celebración de la Selmana de les Lletres, que yá se venía faciendo n’años anteriores, pero creo qu’esti añu d’una manera más visible, llevala a otros ámbitos, al propiu RIDEA, que ye onde vamos facer la presentación del llibru oficial de la Selmana de les Lletres”.

Ésti lleva’l nome de ‘Conceyu Bable: el frutu y la semiente’ magar que’l lema d’esta Selmana de les Lletres Asturianes sía ‘Arguyu d’identidá’. “¿Por qué? L’artículu que me tocó escribir a min ye un poco de xustificación y contestualización del llibru. Cuento más o menos lo que pasaba n’Asturies, nel mundu, n’España, va 50 años. Un garrapiellu d’anécdotes, de fechos y de feches, ente les que tamién esplico un poco que Conceyu Bable foi’l resultáu d’una llingua milenaria, dende los tiempos del Fueru d’Avilés, que foi la semiente de tol procesu anterior d’una llingua que siguió viva en circunstancies abegoses y que llegó hasta los nuesos díes col acentu de toles xeneraciones muertes, como suelo dicir yo. Pero foi al mesmu tiempu la semiente de tolo que vieno detrás”, respuende.

Asina, “Conceyu Bable foi un movimientu, una asociación, decisiva, determinante, pal futuru de la llingua asturiana. Hai movimientos y fenómenos que se dieron darréu, como’l Surdimientu lliterariu, el Nuevu Canciu Astur, que diben ser impensables ensin la esistencia de Conceyu Bable y l’arrogancia de los homes y muyeres de Conceyu Bable y la so valentía pa defender la llingua en distintos espacios y nos medios de comunicación, na cai, cola manifestación histórica de xunu de 1976 qu’atropó a cuasi 6.000 persones en Xixón coles señes ‘Bables nes escueles’ y ‘Autonomía p’Asturies’ pero que recoyía otros plantegamientos democráticos como l’amnistía de los presos y preses polítiques”. D’igual forma, “la creación de l’Academia de la Llingua Asturiana y de la propia Selmana de les Lletres Asturianes, les dos del 1980, diba ser mui difícil concebiles ensin la esistencia previa d’esti movimientu”.

El llibru, que se va presentar el llunes a les 19 hores nel salón d’actos de Real Instituto de Estudios Asturianos (RIDEA), percuerre en 13 artículos “la historia del Conceyu Bable y tol contestu sociopolíticu, sociocultural, d’aquella Asturies de va mediu sieglu. Hai un grupu d’articulistes de distintos ámbitos: periodistes, escritores, profesores universitarios, académicos de la llingua…”. Profesionales que dan “una mirada amplia, periscópica a lo que yera l’Asturies y l’Estáu español naquella década, l’entamu del procesu autonomista y aquel alderique del camín qu’habría de tomar Asturies nesa España de les autonomíes”.

Trés esposiciones

L’actu inaugural del llunes va completase cola apertura de la primer de les trés esposiciones entamaes pa la Selmana de les Lletres Asturianes. Asitiada na entrada de la uvieína Biblioteca d’Asturies, '50 aniversariu de Conceyu Bable. Esposicón de materiales ye una muesta “vintage, dicho con tol ciñu del mundu” que va tar compuesta por “un garrapiellu d’oxetos de toa triba de la época de Conceyu Bable: pegatines, fiches de sociu, fancinos, revistes, cómics… La idea ye facer un percorríu curtiu, pero intensu, a lo llargo d’unes cuantes vitrines, pa que la xente tenga una idea de lo que representó en términos visuales Conceyu Bable naquellos tiempos”.

La segunda, nesti casu organizada pol Muséu de Belles Artes d’Asturies, va inaugurase al meudía del martes. Col nome de ‘Conceyu Bable y l’arte asturianu contemporaneu’, va tar formada por pintures de la dómina de Conceyu Bable y pela tarde a les 18 hores va contar con visites guiaes n’asturianu, a lo que va siguir un espectáculu poéticu-musical n’homenaxe al Nuevu Canciu Astur nel que van intervenir Xaime Martínez y La Familia Tradicional, Mapi Quintana, L-R y Izar Gayo.

Por último, l’Archivu Históricu d’Asturies va acoyer la muesta ‘Conceyu Bable nel so tiempu. L’Asturies de va mediu sieglu’, que s’inaugura’l vienres, Día de les Lletres Asturianes –nel que les llibraríes del país ufren un 10 por cientu de descuentu na merca de llibros o discos n’asturianu–, al meudía. “Va tener continuidá hasta’l mes de xunu y va contar con paneles informativos y vitrines con oxetos interesantes, yá non tanto específicamente de Conceyu Bable, sinón un poco alredor de Conceyu Bable y d’otros ámbitos de lo que yera’l procesu autonomista d’Asturies a partir de 1974, de la fecha fundacional de los Conceyu Bable, hasta finales de los años 70 y lo primero de los 80, que ye cuando echa a andar l’Estatutu d’Autonomía d’Asturies”.

Complétase’l programa de la XLV Selmana de les Lletres con una mesa redonda, el xueves a les 19 hores, nel salón d’actos de la xixonesa Biblioteca Pública Xovellanos, col nome ‘50 aniversario de Conceyu Bable’ y la participación de militantes del coleutivu como Vicente García Oliva, Lluis Antón González, Amalia Trancho y Xuan Xosé Sánchez Vicente, un alderique que va moderar María Xosé Rodríguez López, responsable de la Oficina de Normalización Llingüística de Xixón, y el ‘Conciertu de les Lletres Asturianes’ a cargu de la Orquesta Sinfónica del Principáu d’Asturies (OSPA), que va tener llugar a les 20 hores nel Auditoriu d’Uviéu.

Tamién el llunes 6 y el martes 7

Yá la selmana viniente, va tener llugar el tradicional actu dedicáu al gallego-asturianu, nesta ocasión destináu a les alumnes y alumnos de la escuela pública Xovellanos d’A Veiga, el llunes 6 a les 11.30 hores, la presentación del llibru ‘Dedín, dedín...’ de Belén Rico. Al día siguiente, a les 10.30 hores nel Teatru El Llar de Corvera van entregase los diplomes a los diferentes ganadores de los certámenes escolares.

Un Selmana del les Lletres que va valir “pal conocimientu de Conceyu Bable pa la xente mozo y pal reconocimientu tanto pola xente que nos tocó un poco como pal asturianismu actual. Un reconocimientu y tamién agradecimientu, porque bona parte de la dignidá que foi conquistando la llingua asturiana nestos últimos años tuvo l’arranque con tola xera de los conceyeros y conceyeres, cola xente de Conceyu, a seques, que ye como lo llamaba la so militancia con ciñu”, conclúi Álvarez.