L’enseñu del asturianu y gallego-asturiano va entrar nel segundu ciclu d'Infantil el cursu 2025-2026

El Gobiernu va cumplir cola Llei d’Usu y Promoción del Bable/Asturianu del 1998 na etapa de 3 a 6 años. El cursu 2025-2026 va ufrir l’enseñu del asturianu y gallego-asturiano de forma voluntaria.

Esta mañana’l Conseyu de Gobiernu aprobó un cambiu del plan normativu pa facer la modificación del Decretu 56/2022, de 5 d’agostu, pol que se regula la ordenación y s’afita’l currículu d’Infantil. La revisión del decretu resulta imprescindible pa introducir les llingües propies nesa etapa.

L’enseñu del asturianu y gallego-asturiano va enmarcase nel área de Comunicación y Representación de la Realidá, una de les trés d’esta etapa formativa, y les families podrán escoyelu de manera voluntaria. La so impartición nun conlleva la modificación de los conteníos, polo que se garantiza que toles alumnes y alumnos reciban la mesma formación y algamen iguales competencies, más allá de si les reciben nun idioma o n’otru.

La ufierta nueva va implantase de forma simultánea nos trés cursos del segundu ciclu d’Infantil y tendrá un mínimu de 3 y un máximu de 4 hores selmanales en tola etapa. Las sesiones serán, preferiblemente, de 30 o 45 minutos y los centros habrán fixar, polo menos, una clase a la selmana nel primer cursu pa les escolines y escolinos de 3 años, según informen dende l’Executivu.

Solución al problema de la materia cola propuesta d’Educación d’ampliación de xornaes completes

La inversión prevista ye de 5 millones d’euros y la so implantación, apunta’l Gobiernu, queda supeditada a l’aprobación de los Presupuestos Xenerales del 2025. La incorporación del enseñu de les llingües propies nesti ciclu va llevar a la contratación de 100 docentes a xornada completa.

D’esta forma la Conseyería d’Educación da solución al problema que se presentaba coles maestres y maestros de la materia cola so propuesta pa reducir medies xornaes combinando places asitiaes a menos de 15 quilómetros pa consiguir un horariu completu itinerante, lo que dexaba a decenes de profesionales ensin trabayu.

Ésta foi la reaición de 'Reciella. Families pol Asturianu' a esta anuncia:

Dende que se fundó Reciella en 2012 una de les nuestres peticiones ye que se cumpliera la llei de 1998 y l'asignatura d'asturianu volviera a xeneralizase nes aules n'infantil.
Vagonos la cosa, pero esto ye una noticia perbona.
Agora fai falta cumplir la llei nes otres etapes. https://t.co/mEOkzgAEHM

— Reciella (@Reciella) April 26, 2024

Na semeya, la conseyera Lydia Espina con escolines y escolinos d'Infantil.