El cursu escolar 2024-2025 yá tien calendariu

La Conseyería d'Educación caltién los descansos pedagóxicos, ún per trimestre.

El cursu 2024-2025 va entamar el 10 de setiembre y va finar el 20 de xunu en toles etapes educatives non universitaries. La propuesta presentada a la comunidá educativa cuenta con 177 días llectivos –distribuyíos en 56, 50 y 71 per trimestre–, a los qu'hai que descontar les dos xornaes ensin actividá escolar qu'afita cada conceyu poles sos festividaes llocales.

Les vacaciones de Navidá sumaríen 18 díes (del 21 d'avientu al 7 de xineru), dos más que'l cursu actual, mentes que les de Selmana Santa tendríen un total de 9 (del 12 al 20 de abril), ún menos. Qu'esta festividá cayera metanes abril condiciona'l calendariu, según apunta la direutora xeneral de Centros, Rede 0-3 y Enseñances Profesionales, Eva Leda, "por eso previmos dos descansos de cinco díes nos dos primeros trimestres y otru de cuatro días nel terceru".

El primer descansu pedagóxicu va ser del 30 d'ochobre al 3 de payares, estendiendo la ponte de Tolos Santos, mentes que les escolines y escolinos tamién disfutaríen del de la Constitución (del 6 al 9 d'avientu). La parada del segundu trimestre tendría llugar del 28 de febreru al 4 de marzu, mentes que nel tercer trimestre sería del 1 al 4 de mayu.

Por últimu, el cursu académicu principiaría'l primeru de setiembre que, al coincidir de domingu, a efeutos práuticos se treslladaría al llunes 2, y concluyiría'l llunes 30 de xunu. Al ser esti calendariu una propuesta, quedaría pendiente la firma de la resolución col calendariu definitivu per parte de la conseyera Lydia Espina y la posterior espublización nel Boletín Oficial del Principáu d'Asturies (BOPA).

Na semeya, Ledo –a la derecha de la mesa– y dos funcionaries del so departamentu informen sobre'l calendariu a asociaciones de madres y padres, los comités de direiciones de Primaria y Secundaria de la enseñanza pública y concertada, y les organizaciones sindicales.