González Orejas insiste en que “lo ideal sería que s’afitara nun mandatu los porcentaxes d’asturianu”

Les comparecencies informatives de la Xunta Xeneral sobre la ellaboración del mandatu-marcu de RTPA peslláronse cola intervención del direutor xeneral en funciones del ente. Francisco González Orejas afirmó que “nun podemos llegar más allá n'informativos porque nun esiste un conocimientu suficiente na redaición del asturianu”.

“En materia llexislativa poco tengo que dicir, más qu’esplicar cuál ye’l marcu normativu y les circunstancies na que s’alcuentra anguaño la radiotelevisión pública del Principáu d’Asturies”, principió’l periodista convocáu pola comisión que ta trabayando na redaición del documentu. Ente los datos qu’aportó rescampló que la Llei Xeneral de Comunicación Audiovisual, del 2022, afita que los mandatos-marcu son “por un máximu de 8 años prorrogables. Esto ye una novedá con respeuto a la nuesa llei –del 2014–, qu’establecía 9 años”.

Nun citó a les llingües propies d’Asturies na so intervención, anque sí tuvo que responder a entrugues al respeuto. Siguiendo l’orde de grupos de menor representación a mayor, la primer en cuestionar sobre’l tema foi Cova Tomé, diputada eleuta por Podemos, en concreto sobre la promoción del asturianu y del gallego-asturiano.

“L’asturianu tien presencia na programación de la radiotelevisión pública, apuntó González Orejas “ensin entrar en porcentaxes, porque los porcentaxes nel so casu deberíen determinalos bien el mandatu-marcu bien el contratu-programa”. Una escusa qu’emplega siempre nes sos intervenciones en comisión pa xustificar l’ausencia d’un mayor apueste pol idioma nel ente que, na so opinión, “con naturalidá y con ciertu gradualismu fuimos aumentando”, citando específicamente’l resume de noticies n’asturianu que s’emite al final del informativu de la nueche.

“Lo ideal sería que s’afitara formalmente nun mandatu, nun contratu, los porcentaxes de programación d’asturianu y de serviciu públicu, d’entretenimientu, de cualquier naturaleza”, añadió yá fuera de tiempu.

La oposición del 2006

Sería’l popular Manuel Cifuentes l’otru diputáu n’entrugar sobre l’asturianu al direutor xeneral en funciones, interesáu en saber si la presencia del idioma “supón dalgún tipu d’esfregón cola plantía que tien que facer esta llabor”. “Les decisiones en RTPA nun les tomo yo, hai un comité de direición y un conseyu d’alministración qu’aprueba les llinies xenerales de programación”, principó González Orejas, que señaló que “hai en mui pequeña escala producción de programes informatives n’asturianu por una razón elemental: a los trabayadores de la casa qu’entraron per aciu d’una convocatoria pública d’emplegu nel 2006, dao que l’asturianu nun ye una llingua de rangu oficial, naquel momentu nun se-yos podía esixir nesi concursu o concursu-oposición el conocimimientu del asturianu”.

“Na redaición d’informativos de RTPA hai un porcentaxe eleváu, o dicho al contrariu, sólo hai un pequeñu porcentaxe de trabayadores que manexen con soltura l’asturianu”, esplicó darréu. Nesi sen citó l’entamu de cursos voluntarios pa la plantía “nel 2007, nel 2010, nel 2013, nel 2016 y tenemos agora en marcha ún, nel 2024” y afirmó que “nun podemos llegar más allá n’informativos, anque quixéramos, porque nun esiste un conocimientu suficiente na redaición del asturianu”.

Otra manera, citó que na convocatoria d’estabilización del ente públicu de comunicación “incorporamos como méritu, nel casu de los trabayadores de la redaición, l’usu del asturianu”. Una convocatoria que tuvo dos demandes, apuntó.