Iniciativa abre matrícula pa un cursu d'asturianu

Les clases van allargase del 29 d'abril al 12 de xunetu con estes carauterístiques y plazos.

Iniciativa pol Asturianu, una vegada finaos los cursos de llingua asturiana de nivel básicu 1 y 2 qu'arrancaron en xineru, convoquen ún nuevu, nesta ocasión namái de nivel básicu 1. Al igual que la convocatoria anterior, va ser a distancia, al traviés d'una plataforma dixital, lo que "favorez la autoorganización del alumnáu y permite-yos dir faciendo les actividaes según l’horariu de caún, de manera mas conveniente", entiende l'asociación.

El nivel ufiertáu pa esta primavera "ta empobináu a persones ensin formación d’asturianu o con nivel baxu de conocencia". Les clases van desenvolvese del 29 d'esti mes al 12 de xunetu, un total de 36 hores llectives.

El plazu de matrícula va tar abiertu hasta un día enantes, el 28, con un preciu de 60 euros que pa les socies y socios d'Iniciativa pol Asturianu queda en 50. El trámite pue facese al traviés d'esti enllaz.

El tope d'alumnos por cursu ye de 20. Toles persones que superen el cursu van algamar una acreitación de l’Academia de la Llingua Asturiana en forma de diploma.

Na semeya, dalgunos materiales afayadizos pa deprender asturianu pertenecientes a la esposición de la Xira pola Oficialidá, na parada del mes pasáu en Parres, qu'entamen Iniciativa pol Asturianu y la Fundación Almastur.