Si yes una 'lleenda urbana' pues tener una de les ayudes al retornu

El Gobiernu anuncia que la partida d'ayudes pa facilitar el retornu d’emigrantes va ser cinco veces mayor que na convocatoria anterior. Tamién va facer cambios nes bases pa incorporar “perfiles nuevos”.

“Queremos facilitar el billete de vuelta a la nuesa tierra”, rescampló la vicepresidenta Gimena Llamedo. L'impulsu demográficu ye una de las prioridaes del Gobiernu, que va entamar delles midíes pa favorecer el retornu, como la modificación de les bases pa la concesión d'ayudes a les persones que quieran tornar.

Según informa Llamedo, les subvenciones p'afrontar los gastos esceicionales derivaos del asentamientu n'Asturies van aumentar un 30 por cientu, hasta un máximu de 6.000 euros por unidá familiar. Estes ayudes cuenten nel Presupuestu del 2024 con una partida de 500.000 euros, cinco veces más que na convocatoria anterior, un creitu per primer vez ampliable pa poder garantizar la cobertoria de toles solicitúes.

Los cambios más significativos nes bases son los siguientes:

• Incrementu del límite de renta, p'alcanzar los perfiles nuevos de la emigración asturiana.
• Rebaxa del tiempu mínimu de residencia nel estranxeru, que pasa de 10 a 4 años, cola intención d'abrir les oportunidaes del retornu a los perfiles nuevos.
• Ampliación hasta'l segundu grau de consanguiedá, lo que permite l'accesu a les nietes y nietos de persones emigrantes.
• Bastará con tener la nacionalidá cuatro años enantes de solicitar les ayudes en llugar de les 10 actuales.
• L'ayuda aumentará un 25 por cientu nel casu de que'l retornu sía nun conceyu en riesgu de despoblación según la zonificación que va recoyer la Llei de Retu Demográficu.
• Apoyu específicu a les víctimes de violencia de xéneru.
• Nel casu de que nuna mesma unidá familiar convivan un matrimoniu o persones con una rellación análoga que tuviesen derechu a la ayuda de forma individual, la cuantía pue xubise un 50 por cientu.

Na semeya, la direutora xeneral d'Emigración y Polítiques de Retornu, Olaya Gómez Romano, y la vicepresidenta y conseyera de Presidencia, Retu Demográficu, Igualdá y Turismu, Llamedo, ayeri nel actu de presentación d'estes modificaciones de les bases.