Claudia González: “Aína vien a asturianizar la política”

Aína celebró'l día 16 la so III Asamblea Nacional, na que decidió nun presentase a les Europees. Claudia González Rodríguez (Lluanco, 1999), pianista emigrada a Barcelona pa estudiar un máster na ESMUC, ye covocera de la formación.

Pasó cuasi un añu y mediu dende’l Congresu Fundacional. ¿Cómo ta siendo’l camín?

Emocionante y ilusionante. Facemos camín pa construyir l’Asturies cola que suañamos, poniendo granín a granín la nuestra individualidá al serviciu de la organización y lo coleutivo. Ye una suerte tremenda militar nun partíu como Aína y presenciar de primer mano’l so espoxigue, arrodiaes, amás, d’un grupu humanu esceicional.

Dende esti sábadu ocupa de manera oficial un puestu nel Secretaríau del partíu, compartiendo’l cargu de vocera con Esteban González Corteguera. ¿Yera necesario crear esti cargu pa tener más presencia pública?

Dende la Mesa Nacional consideramos qu’esti momentu, un añu dempués de la primer asamblea, yera perfeutu pa qu’entamare a andar l’órganu del Secretariáu, contempláu nos nuestros estatutos, buscando más eficiencia y efectividá nel funcionamientu del partíu. Pa ello, Silvia Fernández García y Marcos Rodríguez van ser dos pegoyos fundamentales dende la Coordinación Xeneral.

Pienso que la presencia pública ye una estaya más amplia que va dende la participación nes movilizaciones a les conversaciones nos chigres, pasando peles redes sociales. Sicasí, les portavocíes son una manera de poner cares y cercanía a esa presencia y a les comunicaciones esternes.

El sábadu 16 Aína celebró la III Asamblea Nacional, na que la militancia decidió nun presentase a les Europees. ¿Por qué s’optó por esta postura?

Les afiliaes que participamos nesta III Asamblea decidimos unánimamente nun presentanos a les europees pa dirixir tola fuercia y medios nel nuestru camín, ye dicir, facer partíu, construyir discursu propiu y afondar nel programa políticu. A la fin, ponenos a toes en movimientu, como diz el lema q’escoyimos nesta ocasión, y centrar la nuestra actividá na estratexa ‘Asturies 2027’, cola que tenemos trabayu abondu per delantre.

¿Con quién tuvieron contautos de cara a presentar candidatura?

Estes últimes selmanes aconceyamos y contautamos con delles organizaciones coles que compartimos cuestiones programátiques o ideolóxiques de dientro y fuera’l país. El marcu de les Europees foi la escusa perfeuta pa entamar o afondar nestes rellaciones.

Depués de les Europees, nel horizonte queda les eleiciones nacionales próximes. ¿En qué consiste la estratexa ‘Asturies 2027’?

‘Asturies 2027’ ye la marca que mos va acompañar estos trés años que queden enantes d’eses próximes eleiciones. Ye una estratexa en construcción cola militancia que tien que ver, per un llau, cola nuestra organización, formación y actividá interna y, per otru, cola comunicación y aiciones haza l’esterior.

‘Asturies 2027’ ye la marca que mos va acompañar estos trés años que queden enantes d’eses próximes eleiciones.

La primer xera que yá tamos entamando y que queremos que mos ocupe los meses vinientes ye una gran ronda de contautos y aconceyamientos pa texer rede con otros movimientos y espacios afines al nuestru.

Dende la so fundación Aína fala de les eleiciones del 2027 como un oxetivu. ¿Ye Aína un apueste eleutoral? Esto ye, si nun algamaren representación, ¿el proyeutu dexaría de tener sentíu?

De nenguna manera. Aína nació con vocación eleutoral porque somos conscientes d’ónde se tomen les decisiones importantes. Al mesmu tiempu, tamos convencíes de que se puede faer muncha política, oposición inclusive, dende fuera de les instituciones, a pie de cai.

La vida d’Aína nin entama nin fina nes eleiciones de 2027. Vinimos a asturianizar la política, a poner nel centru del debate la nuestra soberanía como pueblu y, en definitiva, a trabayar por una Asturies más feminista y xusta.

Vinimos a asturianizar la política, a poner nel centru del debate la nuestra soberanía como pueblu

El programa políticu qu’asoleyamos en mayu de l’añu pasáu ye’l nuestru puntu de partida y exemplu de too ello. Vamos poner enfotu n’algamar representación na Xunta Xeneral en 2027, pero esti proyeutu, que ye más necesariu que nunca, tien pa dar muncha más tira.

¿Creen que van ser a llegar a la sociedá asturiana como alternativa política?

Si nun lo creyéramos, nun teníemos entamáu’l camín siquiera. El nuestru discursu apella a la gran cantidá d’asturianos y asturianes que tán arguyoses de lo nueso, pero que saben, como nós, qu’una Asturies meyor ye posible: que nun dexe a naide atrás, qu’apueste pola so cultura, que seya más xusta, que tea capacidá de decisión y intervención nes cuestiones que-y afeuten direutamente, que faiga efeutivos los derechos de los falantes d’asturianu y gallego-asturiano, que cuide’l so patrimoniu, que ponga en pie polítiques pa valtiar les discriminaciones y violencies patriarcales, que busque aiciones demográfiques efeutives…

En definitiva, una Asturies na que pague la pena vivir. El sentimientu d’orfandá política que llevó a un grupín de persones a entamar esta alternativa que ye Aína sigue latente na nuestra sociedá. Tenemos trés años per delantre y munchu puxu.

Nestos momentos Aína tien presencia en 33 conceyos. ¿Ye’l trabayu municipal fundamental pa ello?

Sí, ensin duldes. El trabayu llocal ye perimportante pa fortalecer el partíu y la participación de la militancia, una puerta non solo al boca-boca sinón a los llogros piquiñinos pero esenciales nel día a día de la xente. Queremos llegar a tolos conceyos del país, dende l’occidente al oriente.

Tamién ponen enfotu na creación de comisiones de trabayu que lleven a la ellaboración d’informes tan completos como’l de Les Escuelines. ¿Cómo se tán recibiendo?

Ser una organización feminista tien que ver, amás de colos nuestros posicionamientos na materia, cola nuestra forma de faer política y de funcionar. Dímonos cuenta de que’l sistema d’estayes que conformáremos l’añu pasáu nun yera del too conciliable coles nuestres vides nin taba siendo productivu pa cola capacidá de trabayu que podíemos abarcar.

Apoyándonos nes estayes de trabayu, entamamos a probar la formación de comisiones de trabayu conformaes por grupos más reducíos de persones enfotaes nuna temática concreta. El resultáu, amás d’una meyora na conciliación, son estos informes sobre les Escuelines 0-3 y la movilidá nel Valle’l Nalón que conxuguen una investigación fonda col posicionamiento políticu.

La xente aprecia’l trabayu seriu, y paez que ye asina como se tán recibiendo los informes de les nuestres comisiones de trabayu

Tamos convencíes de que son documentos de valor non solo pa la nuesa militancia sinón pa la sociedá xeneral, y ye por ello que queremos siguir trabayando nesti sen nos próximos meses, amosando tresversalidá. Agora mesmo tán furrulando dos comisiones sobre la incineración de residuos y la especialidá docente d’asturianu y gallego-asturiano. La xente aprecia’l trabayu seriu, y paez que ye asina como se tán recibiendo.

¿Tán contentos coles cifres d’afiliaos y el so compromisu?

Tamos percontentes coles más de 200 persones venceyaes al proyeutu, pero nun mos conformamos. Precisamente esta asamblea foi una oportunidá pa reafirmanos nel nuestru compromisu como afiliaes y poner en valor los espacios d’alderique y reflexón coleutiva. Animamos a toles persones que simpaticen col proyeutu a afiliase na nuesa páxina web.

L’afiliación tien una media d’edá de 37 años. ¿Ye Aína’l proyeutu concretu d’una xeneración mui concreta d’asturianistes? ¿Tán consiguiendo llegar a xente más mozo que s’avera a la política o la xente de xeneraciones anteriores que yá participó n’otros proyeutos?

Tamos arguyoses de la media d’edá, envidiable, pensamos, nesti tiempu de desapegu y desencantu políticu, pero quixéramos ser quienes a llegar a eses xeneraciones que mos preceden y que, teniendo participao nos movimientos asturianistes o non, representen la esperiencia y son espeyu de la realidá demográfica d’Asturies n’actualidá. Esti ye quiciabes ún de los nuestros retos pa los próximos años. Per otru llau, yo mesma soi exemplu d’esa mocedá que s’avera per primer vegada a la militancia dientro d’un partíu.

Falaba enantes de la ronda de contautos con otros partíos, sindicatos y coleutivos. ¿Cuálos son los oxetivos d’estos alcuentros?

L’oxetivu principal ye conocer de primer mano’l trabayu de los coleutivos que formen el texíu asociativu, políticu y sindical asturianu: alimentanos de los sos esmolecimientos y propuestes, danos a conocer, que sepan que pueden cuntar con nós como canal pa les sos reivindicaciones si lo necesiten, apurrir los nuestros análisis sobre dellos temes y presentanos como una organización útil. Ta siendo un procesu arriquecedor que vamos siguir esplorando como parte de la nuestra estratexa ‘Asturies 2027’.

¿Cómo ve la situación política d’Asturies tres l’escenariu posterior a Podemos? ¿Pretende Aína ocupar dende l’asturianismu esa parte del espaciu políticu?

Cuido que la situación ye esmolecedora y, al mesmu tiempu, d’oportunidá. La realidá ye qu’agora mesmo nun hai nengún partíu asturianu a la esquierda del PSOE-FSA con representación na Xunta Xeneral que tea faciendo llabor d’oposición al gobiernu. Pretendemos ocupar esi y tolos espacios a la esquierda con vocación asturianista a los que seyamos capaces de llegar.