Les viviendes turístiques dispárense n'Asturies: de 6 a cuasi 4.000 en 8 años

Esti aumentu ye una de les causes de la xuba nel preciu del alquiler.

Les viviendes d'usu turísticu rexistraron un ascensu escomanáu nos 8 años últimos. Los datos daos a conocer pola Sociedá Asturiana d'Estudios Económicos y Industriales (Sadei) sobre establecimientos hoteleros y places del 2023 asitien el so númberu total en 3.779, a les qu'habría que sumar les viviendes vacacionales, otres 2.015.

La cifra supón un aumentu del 28,36 por cientu con respeuto al 2022, cuando había rexistraes n'Asturies 2.944 viviendes d'usu turísticu. Un crecimientu espectacular qu'arrancó nel 2016, yá que dende cuando contabiliza'l Sadei, el 2006, hasta'l 2009 la ufierta yera de 5, que creció a 6 nel 2010.

No que respeuta a les places nes viviendes d'usu turísticu, el total disponible nel 2023 yeren 17.123, poles 22 del 2015. En comparanza col 2022, l'aumentu foi del 30,46 por cientu, al contar con 3.998 más.

Xixón, Uviéu y Llanes, les que más rexistren

El conceyu que rexista el mayor númberu de viviendes turístiques ye Xixón, con 1.464, cuando nel 2015 había 1. Nel 2022 rexistráronse un total de 1.112, polo que medraron un 31,65 por cientu nel 2023.

Uviéu asítiase en segunda posición con 644, anque la medra ye mayor qu'en Xixón, al ser del 35,01 con respeuto al añu anterior, cuando había 477. Llanes, con 520, ye la siguiente na llista, mentes que Cangues d'Onís tien 127, Avilés 111 y Ribeseya 102.

Tanto'l Gobiernu como los conceyos anunciaron midíes pa controlar esti aumentu de les viviendes d'usu turísticu. L'Executivu va regulales cola modificación de la Llei de Turismu y Xixón aprobó en xineru una moratoria d'un añu pa conceder más llicencies nes zones más saturaes, esto ye, el centru, L'Arena, Cimavilla y El Carme.

Na semeya superior, gráficu del Sadei sobre la evolución de los establecimientos turísticos según el tipu, y nel inferior otru del Sadei sobre la evolución del númberu de viviendes d'usu turísticu.