Día de la Narración Oral: Asturies estrena esta celebración con presencia de les llingües propies

El 20 de marzu conmemórase’l Día de la Narración Oral, una fecha qu'Asturies celebra esti añu per primer vez. Cultura entama una sesión n'Uviéu con presencia del asturianu y el gallego-asturiano na que van intervenir cuatro narradores y dellos non profesionalizaos.

Suecia, nel 1991, foi’l primer país en festexar el Día de la Narración Oral coincidiendu col equinocciu de primavera. Narradores tradicionales contaben cuentos pel tol territoriu, una iniciativa que foi espardiéndose per otros llugares pa caltener y divulgar el patrimoniu oral.

A Asturies llega esti 2024 de la mano de l’Asociación de Profesionales de la Narración Oral en España (AEDA) y de la Conseyería de Cultura, Política Llingüística y Deporte, qu’entamen pa esti día una sesión coleutiva d'histories narraes nel Muséu Arqueolóxicu d’Asturies que va principiar a les 18.30 hores. David Acera, Carlos Alba y Ana Morán, xunto col gallegu Caxoto, van protagonizar esta xornada, a la que se conviden a otros narradores non profesionalizaos pa convertir esti eventu nuna gran fiesta del cuentu.

Dende’l Gobiernu promociónase esta xornada cola edición de cartelos en dos versiones: asturianu y gallego-asturiano.

Circuitu en ‘Asturies, Cultura en Rede’

La narrativa tradicional tien presencia esti añu per primer vez con circuitu propiu en ‘Asturies, Cultura en Rede’. Pal primer semetres tán programaes 53 actividaes de 27 profesionales pa tou tipu de públicu en 39 conceyos.