“N’Asturies la danza nun ye’l baille”, alvierte Ambás

El músicu esplícanos la diferencia: “dalgunos medios confunden los términos, lo que demuestra que nun tenemos idea de cultura asturiana. Siéntome una vez más un marcianu n’Asturies”.

Ana Vanessa Gutiérrez anunció’l martes l’entamu del procesu pa declarar Bien d’Interés Cultural (BIC) a la danza asturiana, que “sigue güei viva y enraigonada tanto en contestos rurales como urbanos”, apuntó la conseyera de Cultura, Política Llingüística y Deporte. Un decisión que sal d’una propuesta de Xosé Antón Fernández ‘Ambás’ y Ramsés Ilesies, responsables del Archivu de la Tradición Oral d’Ambás (ATOAM).

“Va un tiempu reunímonos con Vanessa, que nos planteó l’interés de facer BIC dellos bailles tradicionales y quería asesorase de qué bailles nos paecíen identitarios y cuáles se podíen de dalguna manera protexer. Ye ehí cuando ponemos enriba la mesa la importancia de la danza na cultura asturiana”, recuerda Ambás, qu’espón que bailles como la ‘jota’, la muñeira, el saltón o’l son d’arriba nun se baillen namái nel país.

“Asturies tien unes señes d’identidá en folclor diferenciaes que dende Asturies son les que se tienen que potenciar”, considera l’espertu. Asina, “Ramsés y yo comentamos a Vanessa qu’hai una seña d’identidá propia de los asturianos que ye la danza”, lo que llevó a la conseyera a pidi-yos un informe que dio pie al entamu de tol procesu pa declarala BIC.

“Ye dalgo diferenciao”

Les primeres informaciones en prensa y televisión sobre l’anuncia nun pudieron más que sorprender a Ambás. “Cuando veo a un grupu de sección femenina baillando a lo suelto quedé impresionáu y eso ye porque nun tenemos idea de cultura asturiana. Siéntome una vez más un marcianu n’Asturies”, espresa’l músicu, qu’alvierte que “n’Asturies la danza nun ye’l baille. Los medios piensen que la danza ye’l baille. Y precisamente la danza y el baille n’Asturies ye una seña d’identidá, ye dalgo diferenciao”.

“Si nun dices la danza prima, que ye un términu cultu y eruditu –que’l pueblu nun diz, porque’l pueblu diz ‘la danza’–, tol mundu piensa nos ‘bailles rexonales’”, amplía l’espertu, que fai referencia a la “aculturización que tenemos”. Asina espón que “n’Asturies danzar dánzase la danza y baillar báillense los bailles, a lo suelto, que son los vieyos, o a lo garrao, que son los modernos. Yo puedo baillar a lo suelto una ‘jota’, una muñeira, el son d’arriba…, y puedo baillar a lo garrao’l pasodoble, el vals…, pero nunca voi a baillar una danza”.

“Hai muncha xente que lo diz, pero ye un error. El pueblu nunca va dicir eso. Dicen vamos a danzar o vamos a armar una danza”, amplía.

La danza asturiana son “estructures en corru que dan vueltes al son de la voz, de los cantos, que tien muncha vitalidá en munchos sitios”. Asina Ambás cita “Mieres en San Xuan, villes marineres como Candás, n’Avilés, en Ḷḷuarca, les dances de Llanes, les dances de Pola Siero... Y llueu les dances del mundu rural, que son toles estructures en corru con cantares con esi mesmu pasu y esi movimientu del brazu dando vueltes nel sentíu contrariu de les aguyes del reló”.

Ta presente en 59 de los 78 conceyos del país y tamién ta documentada en pueblos Lleón que tienen cayida xeográfica p'Asturies como Sayambre y Valdeón, y otros de la raya que comparten rasgos culturales como Casares o Torrestíu; esto ye, la práutica totalidá sacante la zona occidental y les dos peñamelleres. Una estensión que fai que sía una seña d’identidá única y propia del pueblu asturianu.

Nesti puntu, Ambás especifia que la danza “nun hai que confundila con otra cosa que n’Asturies llamamos tamién ‘danza’, que son les dances rituales de palos o del Corpus”. Éstes fáense en munchos sitios, como Trabáu.

El BIC, importante pa que “la xente sienta, estime y aprecie lo que ye”

“Depués d’analizar tolos datos que-y dimos, Vanessa violo interesante”, rellata’l músicu, que rescampla de la escritora que “ye una conseyera con una sensibilidá brutal pa cola cultura del país y eso ye una suerte”. Entama asina un procesu que conllevaría a declarar a la danza como BIC, el nivel más altu de proteición del patrimoniu cultural n’Asturies.

“A veces hai que declarar les coses de dalguna manera pa que la xente les aprecie, lo que ye terrible”, apunta al respeuto Ambás, qu’asegura “tolos bienes BIC pueden tener ayudes europees, que pueden dir pa clases de danza o pa revitalizar dalgunes que tán morriendo. Y sobre too, lo más importante pa min, ye que la xente sienta, estima y aprecie lo que ye, porque eso ye muncho mayor que lo económico”.

Al respeuto, entrúgase: “los asturianos, ¿sabemos lo que ye la danza? ¿Sabemos que ye una seña d’identidá propia? ¿Sabemos que ye lo más antiguo y que llegó a esti tiempu? ¿Sabemos que ye dalgo colectivo nel que participa tol mundu, que nun tien una coreografía difícil, lo que lo fai tar más vivo? ¿Sabemos que siguimos cantando romances de la Edá Media pa danzar? ¿Sabemos que les hai abiertes y cerraes? ¿Sabemos que les hai profanes y relixoses? ¿Sabemos que les hai dende Navia hasta Llanes? ¿Sabemos que pela montaña les hai dende Cabrales hasta’l Partíu Sierra de Cangas? ¿Que casi coincide coles fronteres históriques de los ástures?”. “Por eso nos animamos a plantear esto”, sentencia Ambás.

Na imaxe, muyeres de Sograndiu (Proaza) a la danza. Semeya del 2023 propiedá del ATOAM.