Escuelines infantiles asturianes 0-3: ¿guarderíes o centros educativos?

Como madre téngolo claro. Les escuelines infantiles son centros educativos, que cuenten con una propuesta pedagóxica y con un personal formáu, non pa guardar neños y neñes, sinón p’ayudalos a desarrollar al máximu les sos capacidaes en toles facetes del so desarrollu. Esta rede tien que tar xestionada dende la Conseyería d’Educación y por supuesto tien que ser pública y nun tar sometía a conciertos educativos. Cuento que comenzará a furrular, que sedrá gratuita y de xestión directa per parte de l’alministración autonómica y qu’arrancará con 31 escueles infantiles con un total de 54 unidades, pero ¿van pasar toles escuelines a formar parte de la xestión autonómica? ¿En qué condiciones van facer esti cambiu? Amás, ¿ye esto un indicativu de calidá? Na mio opinión, la calidá educativa va muncho más allá que l’apertura de escuelines, midida que me parez bien pero que ye insuficiente.

La estaya educativa de 0-3 años, ye una estaya con carácter propiu. Ye una etapa d’aprendizaxes d’habilidaes básiques pa la vida como la comunicación, l’alimentación, el desplazamientu, el control d’esfínteres y pa ello ye básicu qu’esista un apegu seguru y un vínculu sanu col adultu. Amás ye una estaya onde los y les escolines son dependientes dafechu de la persona adulta y vulnerables, polo que la disminución de les ratios ye una cuestión fundamental si queremos falar realmente de calidá educativa. Precisamos que les ratios s’aprosimen lo más posible a les siguientes cifres: 0-1 años: una persona adulta por cada cuatro escolines; 1-2 años: una persona adulta por cada seis escolines; 2-3 años: una persona adulta por cada ocho escolines.

Hai que recordar que cada menor tien el so propiu ritmu de desarrollu y qu’atopamos niveles onde tolos escolinos ya escolines son dependientes del adultu pa satisfacer toles sos necesidaes. Otros, onde atopamos escolines que nun saben caminar (mezclaos con otros que tán arrancando), y con otres que yá caminen con autonomía. Poro, ye fundamental, dotar de recursos personales a les escuelines que tán yá en funcionamientu y a les nueves, cumpliendo asina coles recomendaciones europees a nivel de ratios y permitiendo a les sos trabayadores exercer los sos derechos llaborales que por falta de personal munches nun pueden nin pidir asuntos propios.

D’otra banda, si queremos falar d’escuelines inclusives, tenemos qu’incluir personal especializáu a les mesmes, qu’atienda de forma inclusiva les necesidades individuales del alumnáu con diversidá funcional. Facer escuelines accesibles a tol alumnáu ye un pegoyu fundamental si queremos falar de calidá. Ye urxente, amás, estabilizar al personal que trabaya nes escuelines, cumpliendo coles directrices europees y reduciendo la temporalidá.

Otra manera, la conciliación pa mi nun ye’l cuidáu per parte de terceres persones de los y les nuestres fies, sinón que conciliar ye disfrutar de criar y ver crecer a los y les más pequeñes de la casa. Ye necesario que faigan midíes efectives de conciliación familiar. Con permisos remuneraos pal cuidáu de la infancia ampliando los de pa/maternidá p’abarcar el primer añu de vida de la reciella (sobre too’l permisu de maternidá que lleva ensin revisión dende l’añu 1989). Les madres autónomes siguen ensin tener permisu de llactancia o seguridá económica nes sos baxes. Les madres monomarentales crecen pero ensin nengún apoyu. Siguimos viviendo discriminación salarial y la precariedá llaboral… Precisamos permisos que nos permitan criar con apegu y respetu a la infancia, garantizando’l so cuidáu cuando hai una enfermedá. Somos padres y madres y sabemos que la escuela infantil nun ye una midida de conciliación. Cada dos por tres tán con una enfermedá y hai que cuidales. Hai horarios, llóxicamente, llimitaos que nun permiten adaptase a les nuestres necesidaes…A la fin, l’ampliación de los permisos remuneraos pal cuidáu de la infancia ye dalgo imprescindible pa les families. Amás d’una ufierta de campamentos y actividades municipales pa los periodos non llectivos qu’ayuden a les families n’esos momentos.

De la mano d’esta cuestión, vien otra bien importante: la infancia nun puede trabayar les mesmes hores que los sos padres o madres. Tenemos una infancia agotada qu’acude más hores a la escuela con meses o un añu de vida que llueu al colexu. Ye más; ye una infancia que nun tien más qu’un mes de vacaciones al añu y esto ye una carga y un estrés mui grande pa los mas pequeños y pequeñes. Amás, el personal educativu de les escuelines ta sometíu a una carga llaboral y un agotamiento estremu al nun disponer namas que’l mes d’agostu llibre. Ye imprescindible que les escueles infantiles sigan el calendariu escolar como les demás estayes educatives. La infancia necesita descansar y el personal de les escuelines, tamién.

Otru aspecto de gran importancia ye la xestión de los comedores escolares. Tenemos que recuperar el modelu de xestión de los centros onde tienen personal de cocina que fai la comida nel día y de calidá, con menús equilibraos y diseñaos por nutricionistas y productos de prosimidá y consumu llocal. Nun podemos escaecer qu’un de los aspectos fundamentales de cualquier centru educativu públicu ye’l compensar les desigualdaes sociales y dotar de recursos al alumnáu en riesgo de probeza. El comedor escolar cumple con esta función social polo que se tien qu’ufiertar un serviciu públicu de calidá.

Tamién hai que resaltar la importancia de la estimulación y atención temprana que cumplen les escuelines. El compensar desigualdaes sociales ufiertando oportunidaes de socialización, estimulación cognitiva, comunicativa, motriz…qu’en cada vez más ocasiones, cuesta algamar dende los llares. Pa llograr esti aspectu, precísase de formación específica per parte del personal de los centros y un respetu firme y comprometíu coles etapes del desarrollu infantil. Nun queramos correr demasiáu y quemar etapes de desarrollu y madurez; hai que respetar los tiempos de la infancia ya invitar a les families na participación texendo rede ente les escuelines y los hogares. Dexemos nuestra visión adultocéntrica de llau y recuperemos la mirada cola que ven el mundu los y les neñes.

Por último, nun podemos escaecer que les zones rurales d’Asturies siguen ensin disponer d’esti recursu, como’l suroccidente, o que les grandes ciudaes siguen teniendo mui poca ufierta de places. Amás, esta estapa necesita asturianizar el so currículu educativu. Ye una estaya onde lo próximo, los entornos ecolóxicos y naturales son los más favorables pal aprendizaxe. Hai que tener en cuenta que l’asturianu y eonaviegu son les llingues maternes de munchos neños y neñes polo qu’hai que proporcionar formación llinguïstica del personal y asegurar l’usu de la llingua materna nel entornu escolar ya dende les primeres etapes.

María Fernández ye integrante de la Mesa Nacional d'Aína.