Asturies, representada nel foru sobre minoríes nacionales FUEN

Inaciu Galán asiste a la conferencia que se celebra estos díes en Bruxeles.

La ‘Ewald Ammende’ International Expert Conference, entamáu pola Federal Union of European Nationalities (FUEN), celébrase estos díes cola participación periodista y activista, vocal d’Iniciativa pol Asturianu. Esti foru que tien llugar en Bruxeles tien l'oxetivu de "aldericar sobre la situación actual sobre les minoríes europees pa contrarrestar la grave regresión na proteición de les minoríes europees col fin d'ameyorar la so proteición", apunten dende la organización.

"Les xornaes axunten a espertos de delles comunidaes llingüístiques d’Europa pa estudiar acciones que solucionen la situación d’angüaño de les llingües y ver qué propuestes pueden facese a la Xunión Europea, a los estaos y a la ONX, ente otres instituciones", especifica'l xixonés. En total son 40 los espertos de toa Europa nel campu de la proteición de les minoríes presentes na capital belga pa la conferencia que va desenvolvese güei y mañana.

Dende Iniciativa por Asturianu apunten que nel 2021 la Comisión Europea se negó "a entamar acciones lexislatives sobre cualesquier de les propuestes de la Iniciativa Ciudadana Europea Minoritaria SafePack". Nel 2023, la conclusión del Tribunal Européu de Derechos Humanos foi que "la educación nuna llingua minoritaria –y el conteníu del Conveniu Marcu pa la Protección de les Minoríes Nacionales– nun formen parte de 'un consensu européu'", dos exemplos de les "evoluciones negatives nel ámbitu de la protección de les minoríes n’Europa".

"Podemos afirmar que la protección de los drechos de les minoríes nun se ta estancando n’Europa, sinón que ta claramente retrocediendo. Esto ye sorprendente na midida en que tolos exemplos de bona protección de les minoríes n’Europa amuesen que traxeron paz y prosperidá y, polo tanto, representen una ventaya non sólo pa la minoría en cuestión, sinón pa tol Estáu otorgante y que’l respetu de los drechos de les persones pertenecientes a una minoría ye, supuestamente, ún de los valores fundamentales de la Xunión Europea, sinón de tol proyectu européu", apunta la organización.

Na imaxe, una de les xuntes celebraes esta mañana. Semeya obra d'Inaciu Galán.