Ixuxú Cultura trai a Uviéu a los vascos Nøgen

Ye la segunda visita a Asturies de la banda donostiarra, que compón n'eusquera.

Ixuxú Cultura, promotora de conciertos especializada en llingües minorizaes, encara marzu con dos cites, la primera l'actuación de Nøgen mañana n'Uviéu. Esta formación moza toca estilos como l'indie, folk, pop y rock con influencies como La M.O.D.A o Mumford and Sons, una propuesta qu'asitia a esti grupu como ún de los destacaos de la renovación musical de la escena vasca.

Presentes n'Uviéu nel 2019, tornen agora a Asturies pa presentar el so tercer trabayu, 'Åben Cirkel'. La cita ye a les 21.30 hores en La Salvaje, con entraes a 10 euros anticipada y a 12 na puerta.

Actuación doble de Dupla

Les propuestes pa esti primer trimestre del añu, qu'incluyó tamién el II Semando Fest y el conciertu primer aniversariu d'Ixuxú Cultura con Skontra y la tamién vascos Zea Mays, entrambes con toles entraes vendíes, van completase con dos actuaciones d'otros conocíos pol públicu asturianu. Dupla, qu'ufrió dos actuaciones va xusto un añu, va tocar de baldre na Lata de Zinc (Uviéu) el vienres 15 a les 21.30 hores xunto DJ Sandrasian d’Abres y al día siguiente en La Traviesa (L'Infiestu) a la mesma hora, nesta ocasión en compañía de DJ Avante’l Pueblu.