¿Ye, de verdá, esta cruz visigoda l'antecedente de la del Reinu d'Asturies?

[Cruz visigoda (izda.) y cruz astur (dcha.)]

Dellos espertos cuestionen l'interés ideolóxicu en rellacionar el reinu asturianu col visigodu

La prensa castellano-manchega y dellos medios estatales como El Español, vienen faciéndose ecu nel día de güei del descubrimientu d’un relieve que daten d’época visigoda y presenten como un precedente direutu de “la cruz de Oviedo”. La información, difundida tamién güei n'Asturies a traviés de l'axencia Europa Press, refierse a un elementu atopáu nuna vivienda de la población de Casarrubios del Monte, nel norte de Toledo, cuasi na llende cola Comunidad de Madrid, dientro d’un proyeutu d’investigación dirixíu polos arqueólogos Jesús Carrobles, Jorge Morín y Rubén Pérez.

La supuesta rellación básase principalmente en que de los brazos de la cruz cuelguen l’alfa y omega, asina como que’l brazu inferior fina nuna empuñadura, pero lo cierto ye qu’esa tipoloxía de cruz ye habitual nesi tiempu en diferentes puntos d’Europa, lo que nun paez abondo p'afirmar qu'esiste una continuidá llinial ente entrambes cruces.

Margarita Fernández Mier, caderalga d’Historia Medieval de la Universidá d’Uviéu, considera que pa poder interpretar el relieve “lo que necesitamos ye saber en qué contestu apaez. Cuando se descontestualicen les pieces, creense discursos poco rigurosos”. Más cuando se puede partir d’un marcu “que pue forzar determinaes intepretaciones”, como “que tol prerrománicu asturianu ye herederu de l’arquiteutura d’época visigoda”.

Margarita Fernández Mier: "nun podemos facer interpretaciones lliniales dende l’arte del reinu visigodu al arte asturianu ensin tener en cuenta cuestiones de calter social"

“Los coses son muncho más complexes”, sigue al tiempu qu’afirma que “hai que ser mui cautu a la hora d’interpretar material arqueolóxicu del que nun podemos tener trazabilidá”. “El marcu d’interpretación de la cultura material altomedieval ye complexu y nun se pue resumir n’interpretaciones lliniales dende l’arte del reinu visigodu al arte asturianu ensin tener cuenta cuestiones de calter social”, amplía.

La busca d’elementos p’afitar un discursu presentista

Nesi mesmu sen, pero dende la perspectiva del análisis de los discursos históricos sobre Asturies, David Guardado, autor del llibru Nunca vencida. Una historia de la idea d’Asturies (La Fabriquina, 2023), diz tamién qu'hai que ser prudentes con cuestiones nes que suel haber “un interés ideolóxicu en venceyar l'arte asturianu col visigodu, como una continuidá llinial y unívoca”, basándose nuna interpretación mui específica de les cróniques asturianes, qu'escaez el so contestu de producción y reproducción.

“En cuenta de ver el periodu del que falamos como un momentu complexu nel qu'esisten influyencies cruzaes y capes quese van superponiendo, esiste una historiografía tradicional que quier ver el reinu visigodu como'l principiu de la unidá d'España y el reinu asturianu como la so continuidá natural, que siguiría na llamada reconquista, polo que se busca nel arte elementos qu'afiten esi discursu”, añade l’estudiosu.

David Guardado: "la historiografía tradicional quier ver nel reinu asturianu la continuidá del visigodu por un interés ideolóxicu".

Guardado señala que “los espertos tendrán que falar sobre'l tema d'esta cruz”, pero que cruces asemeyaes a la que llamen ‘cruz de Oviedo', col alfa y l'omega, y en contestos mui variaos, “atopámosles en espacios y tiempos anteriores y posteriores en munchos sitios d'Europa, porque nin los visigodos nin Asturies yeren ayenos a los que taba pasando n'Europa y nel conxuntu de la cristiandá, y cruces asemeyaes nun son, como ye bien sabío, una creación visigoda, sinón que pertenecen a una tradición cristiana anterior, que tien distintes ramificaciones y de les que se pueden poner decenes d'exemplos".

Semeya de la cruz visigoda propiedá de Pequeños Arqueólogos.