Asturies ye 'oficialmente' la comunidá menos taurina: éstos son los datos

El Ministeriu de Cultura detalla los festexos taurinos del 2022 nel so últimu informe oficial.

Sacante Canarias y Catalunya, onde les corríes de toros tán prohibíes por llei, Asturies foi nel 2022 la comunidá autónoma con menos festexos taurinos: una única ‘corrida mixta con rejones’, según los datos aportaos pol Ministeriu de Cultura actualizaos hasta esi añu. Nel llau contrariu ta Castilla-La Mancha, con 365, y Castilla y Lleón, con 346.

Asturies acoyó un únicu festexu taurín nel 2022, añu nel que dexó de celebrase la xixonesa Feria de Begoña por decisión de l’alcaldesa Ana González Rodríguez depués de la polémica vivida al salir al ruedu na tercera y última corrida de la del 2021 un exemplar de nome ‘Feminista’ y dos d’igual apellativu, ‘Nigeriano’, de la ganadería de Daniel Ruiz. Nun prorrogaría la socialista’l contratu de concesión de la plaza de toros d’El Bibio a Circuitos Taurinos y nun lu sacaría más a concursu, anque Foro, xunto col PP y VOX, devolveríen la feria taurina nel 2023 al llegar a l'Alcaldía.

Tuvo que ser una inicitiva privada en Benia, promocionada como ‘Gran Fiesta Nacional de la Tauromaquia’, la qu’impidiría qu’Asturies viviera un añu ensin toros. Un eventu que tuvo llugar nuna plaza portátil instalada na llamada finca Morán que sería l’únicu énte la falta de tradición nel país.

Ye por eso qu’Asturies foi la comunidá con menos festexos taurinos nel 2022. Según los datos de la ‘Estadística de Asuntos Taurinos’ del Ministeriu de Cultura, que recueye los celebraos nel Estáu dende’l 2007, esi añu namái nun tuvieron toros Canarias y Catalunya, que los tienen prohibíos por llei, y la ciudá autónoma de Ceuta, declarada "llibre de maltratu animal" nel 2016.

Asturies cuenta col yá citáu, mesma cifra que Melilla, mentes qu’en Galicia y Illes Balears entamáronse 2. Los siguientes na llista son Cantabria, con 17, y La Rioja, con 23.

Castilla-La Mancha, por contra, rescampla como la comunidá más taurina del Estáu, con 365 festexos celebraos nel 2022. Depués atópase Castilla y Lleón, con 346, y la Comunidad de Madrid, con 263, cantidá asemeyada a la d’Andalucía, 249.

Na semeya, manifestación antitaurina en Xixón convocada pola Asociación Nacional Animales con Derechos y Libertades (ANADEL).

Cifres totales: