“‘V.O.S.’ ye’l discu últimu d’una triloxía, un fin de ciclu”, esplica Baselgas

L-R, el dúu formáu por Leticia Baselgas y Rubén Bada, asoleya esti sábadu en plataformes dixitales el so tercer trabayu, que presenta tamién en direuto na xixonesa sala Acapulco. “‘V.O.S.’ ye’l discu últimu que cierra una triloxía que llevamos faciendo dende’l 2016 con ‘Post-folk asturianu’, un fin de ciclu”, espresa la panderetera.

“Tábemos faciéndonos un montón d’entrugas variadas, como a qué suena un sitiu, cómo esos soníos queden nas nuesas memorias colectivas… A lo llargo d’estos años fuimos respondiendo a estas entrugas y al final esto foi un poco a la conclusión a la que llegamos. Ye un discu de más madurez”, sigue Leticia.

D’esti procesu creativu salió ‘Post-folk asturianu’ nel 2018, ‘N.O.S’ nel 2021 y agora esti ‘V.O.S.’, que ye un xuegu “col conceptu de Versión Orixinal Subtitulada, porque nosotros siguimos entiendo como, dende’l principiu de los tiempos, la música que llamamos tradicional ye dalgo que ta vivo, en constante movimientu, y aparte entendemos que ye orixinal porque siempre ta tresmitiéndose como versión y siempre ye subtitulada porque siempre va tar interpretada pola voz de tola xente que la va cantando añu tres añu”.

L-R continúa apostando pola autoedición, seña d’identidá del grupu. “Siguimos cola mesma idea punki del failo to mesma. Creemos que pa un proyectu como’l nuestru, que ye un ‘work in progress’, trabayamos tolos díes nello, ye importante esa idea de l’autoedición, l’autoproducción, l’autodiseñu, porque al final reflexa mui bien el nuesu sentir, les nueses esperiencies mientres lo vamos viendo… Ye un procesu que nos lleva a dir aprendiendo progresivamente d’ello y con él”, rellata.

Ye una forma amás de ver “la maduración del propiu proyectu, cómo los soníos van ameyorando, van faciéndose más sólidos o con una idea muncho más madura, y pasa lo mesmo cola producción gráfica o colos videoclips, qu’eso tamién va notándose porque ye parte d’esi ciclu que nós entendemos que ye esto del post-folk: dir aprendiendo, dir avanzando, dir metiendo idegas que van llegándonos nuevas”. Y como n’ocasiones anteriores, L-R entamó una campaña de micromecenalgu na rede, en concreto pa financiar la edición de ‘V.O.S.’ en vinilu, qu’algamó 3.208 euros, 708 más que los 2.500 necesarios.

Leticia considera qu’estes campañes en Verkami son “dalgo mui guapo porque entendemos que ye cuasi poético. Nosotros facemos una música que sal del pueblu ya pal pueblu, y el pueblu ye’l que tamién nos ayuda a financianos. Ye pura poética”. L’ésitu que tuvo ésta llevó a asoleyar tamién ‘V.O.S’ en CD “porque nos lo demandaba la xente”, añade.

Cuatro adelantos

Mañana ye cuando van tar disponibles tolos cantares del discu nes plataformes dixitales. Un álbum del que yá conocemos cuatro adelantos: ‘Anda neña’, col Coru Al Altu la Lleva; ‘Trébole’; ‘Menodito’, con Los Hermanos Cubero; y ‘Ḷḷuna’, con Rodrigo Cuevas.

Ésta última ye la más reciente, “una collaboración que pa nós ye mui natural porque conocemos a Rodrigo dende va munchu tiempu y surdió como parte del propiu procesu. Foi él el qu’escoyó’l tema, que ye un cantar mui conocíu de Concha i Clara, de Tresmonte”. La pieza acompáñase d’un videu fechu pola propia Leticia “qu’entronca un poco cola otra parte más visual de L-R, que nesti casu ta reflexada colas mios ilustraciones o las mios animaciones”.

Sobre ‘Ḷḷuna’, la cantante considera que ye’l tema “que reflexa meyor la idiosincrasia del discu, porque nel propiu videoclip los subtítulos nun tienen nada que ver colo que ta diciendo la canción. Hai muncha xente que nun entiende entovía’l xuegu de la versión orixinal subtitulada”. “Ye lo que meyor reflexa tola estética o tol discursu, la poética, que lleva esti discu”, calca.

Un conciertu especial

Tamién mañana ye cuando se va presentar l’álbum en direuto. Va ser a les 20.30 hores na sala Acapulco, con una actuación previa de Ferla Megía como artista convidáu.

El públicu que s’avere a esti llocal xixonés nel baxu del Casinu “va atopar dalgo bastante especial. Nun va ser un conciertu de L-R al usu, como la xente ta avezada a venos, porque vamos llevar a otra persona dientro de la formación, a Manu Molina, que va tar con batería y percusiones, polo que la xente nun va ver a dos, sinón a trés enriba l’escenariu”. Tamién va haber delles collaboraciones, como les d’Eva Tejedor & Les Pandereteres, Juanjo Díaz o’l Coru Al Altu la Lleva.

“Vamos intentar que sía bastante únicu y especial porque’l sitiu tamién lo da. Vamos cuidar un poco la estética y que la xente se sienta cómodo, que ye lo más importante de too. Creemos que va ser una gran folixa y que la xente va disfrutalo”, avanza Leticia. Les entraes tán a la venta a un preciu de 12 euros, anticipada, y de 15, na puerta.