El proyeutu de Les Escuelines, que consolida’l so nome n’asturianu, va llegar a 30 conceyos el cursu viniente

El presidente Adrián Barbón y representantes de 28 de los 30 conceyos que van acoyer estos centros públicos que conformen la rede d’escueles autonómiques de 0 a 3 con matrícula de baldre, roblaron los convenios pa la puesta en marcha del proyeutu. Les Escuelines ye’l nome n’asturianu qu’emplega’l Gobiernu pa referise al mesmu.

En compañía de la conseyera d’Educación, Lydia Espina, el socialista participó esta mañana en Presidencia nel actu que supón el primer pasu del “proyeuto tresformador más singular del mandatu”. Un total de 822 plazas distribuyíes en 54 unidaes en 31 centros repartíos en 30 conceyos pal cursu 2024-2025, cola intención de que’l procesa siga nos años vinientes hasta agrupar tolos centros públicos, agora presentes en 46 conceyos, na rede.

Avilés, Bual, Cabrales, Caravia, Casu, Degaña, El Valle Baju de Peñamellera, Grandas de Salime, Illas, Les Regueres, Llanera, Llanes, Mieres, Muros, Parres, Quirós, Ribedeva, Riosa, Santalla d’Ozcos, San Tiso d’Abres, Sariegu, Sotu’l Barcu, Siero, Tapia, Uviéu, Valdés, Villayón y Xixón, que tuvieron representaes nel actu, y La Ribera y Onís, son los conceyos que van contar con estes escuelines con matrícula de baldre. L’oxetivu ye qu’al finar la llexislatura toos estos centros públicos, incluyíos los qu’agora dependen de los ayuntamientos, pasen a ser titularidá de l’Alministración autonómica, integraos nel sistema educativu y con una xestión homoxénea.

“Ye una de les midíes más relevantes que ponemos en marcha p’afrontar el desafíu demográficu”, rescampló Barbón, que calificó a Les Escuelines como “un serviciu públicu d’altísimu valor social”. El propósitu d’esti proyeutu, que ye una realidá “gracies a qu’Asturies tien presupuestos pal añu 2024, gracies al votu favoratible de la FSA-PSOE, Convocatoria por Asturies, Foro Asturias y la diputada Covadonga Tomé”, apuntó’l llavianés na rede social X, ye a curtiu plazu “llegar al restu de conceyos con demanda y ensin escuela y reducir les llistes d’espera nos conceyos más poblaos”.

Na semeya, Espina y Barbón con representantes de los conceyos.