‘Muyeres del llagar’ rescampla’l papel femenín nel mundu de la sidra

Entrevistes asoleyaes na revista ‘La Sidra’ a más de 45 profesionales componen ‘Muyeres del llagar’, llibru editáu por Espublizastur que rescampla’l papel femenín nel mundu sidreru. Roberto González-Quevedo firma’l prólogu d’esta obra de tamañu A4 acompañada de semeyes en blancu y prietu de calidá altá, y David M. Rivas l’epílogu.

Entrambos participaron el mes pasáu nuna presentación celebrada na segunda planta de la xixonesa Escuela de Comerciu a la qu’acudieron gran parte de les protagonistes del llibru. Conducíu por Carme Pérez, tamién se sentó na mesa la escritora Susana Sela y el fotógrafu Flavio Lorenzo Sánchez.

El llector va atopar en ‘Muyeres del llagar’ una edición de gran tamañu con entrevistes espublizaes dende’l 2014 na revista ‘La Sidra’ cola firma d’Arantxa Ortiz, Llucía Fernández, Bea Fernández, Rocío García, Nuria Morán o la propia Sela, ente otres. Conversaciones nes que se fala de sidra, del papel de la muyer nos llagares nel pasáu y n’actualidá, y de futuru.

Acompañen a los testos semeyes de gran calidá d’autores como Flavio, Lujó Semeyes o Xurde Margaride. El resultáu final ye un llibru clave pa entender la importancia que xugaron y xueguen les muyeres, munches vegaes desconocíu, dientru del mundu sidreru.

Na semeya, González Quevedo y Rivas xunto con dalgunes de les protagonistes del llibru.