Cofiño usa l'asturianu con normalidá nuna comisión del Congresu

El diputáu de Sumar tomó la pallabra nel turnu d'intervenciones de la comparecencia de la ministra de Mocedá y Infancia, Sira Abed Rego.

"Hai un poeta asturianu que nun ye mal poeta que diz que la vida ye la infancia y los demás son anexos", entamó Rafael Cofiño depués de saludar a la ministra. Principiaba asina la primer intervención n'asturianu nuna de les comisiones del Congresu, qu'esta selmana estrenaba la interpretación simultánea nel usu de les llingües cooficiales, non nel casu de la llingua asturiana o aragonesa, que necesitaríen d'autotraducción, anque'l xixonés nun la fixo magar emplegar l'idioma na mayor parte del discursu; tampoco naide nun la pidió, nin la diputada de VOX, l'andaluza Blanca Armario, que faló xusto depués.

Nel so turnu, compartíu col so compañeru Nahuel González López, el parllamentariu espunxo, con tonu lliterariu, lo que ye la infancia de la reciella. "Pensamos qu'esta comisión y esti ministeriu nun son menores. Vamos facer y vamos falar y trabayar en polítiques y midíes p'ameyorar la vida de los que van ser les futures ciudadanes d'esti país", aseguró.

Na semeya, Cofiño, con González López a la so derecha.