Aína, Extremeñistas y los lleoneses Alantre esixen la reapertura del corredor ferroviariu ‘Ruta de la Plata’

Formaciones polítiques d’Asturies, Lleón y Estremaúra asoleyaron un comunicáu conxuntu pa denunciar “l'escaezu y abandonu históricu del Gobiernu central col oeste del Estáu”. Esixen al Executivu compromisu pa la reapertura del corredor ferroviariu ‘Ruta de la Plata’ “que vertebre la conexón” ente estos territorios.

El domingu miles de ciudadanos manifestáronse en llugares como Xixón, Estorga, Zamora, Salamanca, Plasencia, Cáceres, Mérida, Almendralejo, Zafra, Sevilla, Huelva y Cádiz pa pidir la recuperación del tren que percorría la nomada ‘Ruta de la Plata’ ente Sevila y Xixón, que tomaba’l nome de la Vía de la Plata romana qu’axuntaba les actuales Mérida y Estorga. Ésta dexó de dar serviciu de viaxeros nel 1985, pero’l deséu d’habitantes y cámares de comerciu d’estos territorios ye’l de volver a contar con esti tresporte.

Aína, Alantre y Extremeñistas sofitaron les manifestaciones y nun comunicáu conxuntu denuncien el “escaezu y abandonu históricu del Gobiernu central col oeste del Estáu, que deriva nuna falta de futuru y oportunidaes pa les habitantes d'Asturies, Lleón, Zamora, Salamanca, Cáceres y Badajoz”. Recuerden que, “pese al sofitu inicial nel Parllamentu Européu pa financiar la reapertura” de la llinia “enantes de 2040, foi l'Executivu español el que lo consideró non vidable, sacando'l so trazáu de la rede básica Transeuropea de Tresporte”, y reclamen “que s'axilice l'estudiu de la reapertura del tramu Salamanca-Plasencia como una primer fase d'inversiones”.

Sería l’aición inicial pal “desendolcu de les comunicaciones ferroviaries d'estos territorios y evitar la necesidá del pasu per Madrid de mercancíes y persones que nun tengan ellí orixe o destín. Esto amenorga'l riesgu de convertir esti nuedu central nun ‘cuellu de botella’, tal y como alvirtió bien de veces la XE”. Por último, les trés formaciones rescamplen que “una vía de comunicación transterritorial con entidá propia y de calidá ye capaz de facilitar tamién la vertebración interna de cada país o territoriu”.

Na semeya, estación de tren provisional de Xixón, con cuasi 13 años d'actividá.