El Plenu aprueba la proposición pa que Xosefa Xovellanos dea nome a la so cai en Xixón

La conceyala de VOX, única n'oponese al cambiu na cai L'Argandona, nomatu que va caltenese a pidimientu del PSOE.

La proposición "sobre'l cambiu de denominación de la cai L'Argandona por cai Xosefa Xovellanos" aprobóse nel Plenu de xineru, celebráu esta mañana. Convocatoria por Asturies foi la formación que la presentó, convidando a la historiadora Arantza Margolles, en representación d'Iniciativa pol Asturianu, pa defendela.

Tolos grupos municipales votaron a favor de la mesma (PSOE, Foro, PP y Podemos), tamién el conceyal non adscritu, ex de VOX, Óliver Suárez Rubio. Namái s'opunxo a la propuesta Sara Concepción Álvarez Rouco, la única edil agora baxo les sigles de la formación ultraderechista.

D'esta forma L'Argandona va pasar a ser la 'cai Xosefa Xovellanos (L'Argandona)', yá que se dio'l preste a una enmienda socialista, partíu cola sede precisamente nesa vía, pa que se caltuviera'l nomatu que vien del apellíu del so home xunto col nome propiu de la escritora, primer autora conocida n'asturianu, cola intención de torgar molesties a los vecinos. La xunta de gobiernu ha ratificar agora la posición del Plenu y pasar al conseyu de distritu pa siguir cola tramitación d'esta modificación.