El secretariu d’Estáu de Tresportes comprométese a estudiar ameyoramientos na bonificación actual del peaxe del Güerna

José Antonio Santano, secretariu d’Estáu de Tresportes y Movilidá Sostenible, presente esti martes n’Asturies, comprometióse a estudiar ameyoramientos na bonificación del peaxe del Güerna, como-y reclamó’l Gobiernu. Éstes podrían llegar a los turismos y demás vehículos llixeros dende’l primer viaxe y non dende’l terceru como hasta agora.

La intención sería qu’esti aumentu de les bonificaciones s’incluyeran nos Presupuestos Xenerales del Estáu pal 2024, agora en negociación, lo que Santano ve “factible”. De momento’l compromisu ye estudiar toles demandes del Executivu asturianu pa rebaxar el costu d’un peaxe que nel primer dia del añu aumentó’l so preciu un 5 por cientu, en 70 céntimos, hasta los 15 euros por trayeutu.

En xunetu del 2022 aprobáronse bonificaciones nueves pa incrementar los descuentos nel pasu pela autopista AP-66, medrando del 50 al 60 por cientu pa vehículos llixeros y del 30 al 40 pa pesaos. Nel casu de turismos namái s’aplica a partir del tercer viaxe mensual pela autopista completa o del quinto pasu de barrera o recorrido parcial al mes, situación que podría camudar agora cola disposición del Ministeriu de Tresportes y Movilidá Sostenible, como confirmó Santano, de “estudiar una bonificación práuticamente dende’l primer viaxe”.

Nel casu de tresportistes, “fíxosenos un pidimientu que vamos analizar pa llegar hasta’l 60 por cientu”. El secretariu d’Estáu aconceyó güei en Presidencia con Adrián Barbón y col conseyeru de Fomentu, Cooperación Llocal y Prevención de Quemes, Alejandro Calvo, xunta na que tamién tuvo presente’l viceconseyeru d’Infraestructures y Movilidá, Jorge García López.

Na semeya, García López, Santano, Barbón y Calvo.