Monteserín cree qu'en seronda tará visible la muralla medieval d'Avilés

Van valtase cinco edificios de la cai La Muralla apegaos a la muria pa dexar llibre unos 100 metros y abrir espaciu pa una plaza que va acoyer un centru d'interpretación.

"Tamos a meses de poder entamar a ver la muralla. Yo creo qu'a lo último d'esti añu yá hai munchas posibilidaes, o inclusive en seronda, de qu'afloremos la parte que ta en superficie", apuntó l'alcaldesa d'Avilés, Mariví Monteserín, nuna visita a la zona esta mañana en compañía de la vicepresidenta del país, Gimena Llamedo, y la viceconseyera de Turismu, Lara Martínez Fernández. Pa ello ye necesario "valtar dalgunes d'estes edificaciones que tán apegaes a la muralla y abrir la plaza na que se va facer el Centru d'Interpretación", esplicó.

En concreto va actuase colos númberos 40, 42, 44, 46 y 48 de la cai La Muralla, operación enmarcada nel Plan de Reforma y Reforma Interior del Cascu Históricu d'Avilés (PEMRICH). "Una de les imáxenes de la ciudá ye la so historia y la muralla ye un símbolu mui importante d'una parte del nuesu pasáu. Va permitinos completar l'atractivu del nuesu estraordinariu cascu históricu, una de les nueses señes d'identidá", añadió Monteserín.

Pela so parte, Llamedo rescampló la importancia de les obres, con una inversión aproximada d'un millón al amparu del plan de sostenibilidá turística del conceyu, financiáu con fondos europeos Next Generation. "Esti proyeutu va permitir sumar un gran reclamu turísticu y cultural a la ciudá y va ponela en primera llinia de la ufierta cultural y patrimonial d'Asturies”, aseguró.

Otres actuaciones

El Plan 'Avilés, patrimonio histórico y natural' recueye más d'una decena d'actuaciones con una inversión de 2,1 millones como aiciones de promoción y marketing, la creación un ximielgu dixital del cascu históricu, l'impulsu de la observación de aves en la ría y la ensenada de Llodero, la construcción de dos aparcamientos disuasorios con 330 plazas nel Parque Empresarial Principáu d'Asturies (PEPA) y La Grandiella, la instalación d'estaciones de préstamu de bicicletes llétriques nueves, la recuperación de les fontes históriques de los Caños de San Francisco y de Rivero, o la rehabilitación de la Oficina de Turismu.

Na semeya, Raquel Ruiz, conceyala de Facienda, Turismu, Comerciu y Mocedá; Martínez Fernández; Monteserín; Llamedo; Manuel Campa, conceyal de Desendolcu Urbanu y Económicu; Ana Solís, conceyala de Vivienda, Consumu y Memoria Democrática; y David García Álvarez, conceyal de Deportes y Normalización Llingüística, frente a los edificios que van valtase pa dexar a la vista la muralla medieval.