Llangréu prepárase pa despidir a Anita Sirgo con una marcha na so memoria al Pozu Fondón

Histórica militante comunista y figura clave de la Güelgona del 62, finó na madrugada cuando taba a unos díes de cumplir los 94 años.

Ana Sirgo Suárez, más conocida como Anita, dexónos esta madrugada llueu d'una vida dedicada a la militancia comunista y la solidaridá. Nacida n'El Campurru (Llangréu) nel 1930 nel senu d'una familia minera y comprometida, vivió na so infancia les consecuencies de la Guerra Civil, col so padre fugáu y asesináu nel 1947 y la so madre presa.

Xuntó la so vida cola d'un mineru del Pozu Fondón, Fonso Braña, nel 1950, y foi una de les muyeres claves na Güelgona que nel 1962 vieno a valtar los cimientos del réxime franquista, un fechu de gran visibilidá en toa Europa, onde s'entamaron güelgues en solidaridá. Enzarróse na catedral d'Uviéu xunto con otres cuarenta esposes de trabayadores de la mina, un coleutivu clave pa propiciar l'allargamientu del paru cola so organización y activismu como piquete.

Militaba nesi tiempu, al igual que'l so maríu, nel PCE na clandestinidá, y siguiría faciéndolo hasta la so muerte. Nun se llibraría de la represión y de les tortures, que-y provocaron perdes d'audición.

Viose obligada a esiliase en Francia, pero nel 1966 tornaría a Asturies pa siguir cola llucha antifranquista, lo que la llevaría otra vuelta a la cárcel per un periodu de cuatro meses. La represión nunca silenciaría la so voz.

Amás de l'actividá política dende'l PCE tamién fixo llabor sindical dende Comisiones Obreres (CC OO). Nel 2013 foi una de les firmantes de la denuncia presentada n'Arxentina contra los crímenes del franquismu conocida como 'Querella arxentina'.

"¡Salud y República!"

El lema "¡Salud y República!" encabeza la esquela de Sirgo, que perdía la vida nel Hospital Valle d'El Nalón. El salón d'actos de la Xunión Comarcal de Comisiones Obreres d'El Nalón, en La Felguera, va acoyer un actu de despidida mañana dende les 16.30 hores, onde va instalase un veloriu güei de les 14 a les 21 hores y mañana dende les 10, que va finar con una marcha reivindicativa na so memoria hasta'l Pozu Fondón.

"Yera una lleenda nes Comisiones Obreres, na llucha de les muyeres y nel feminismu, y la so memoria va permanecer per siempre nel sindicatu. Dexó claro que nun quería un funeral al usu, quería una movilización, na que la xente saliera a la cai", apunten dende CC OO. La previsión ye que s'incinere'l so cuerpu nel tanatoriu La Floría, en Samartín del Rei Aurelio.

Da la casualidá que tamién finara Maruja Ramos, otra muyer venceyada al sindicatu que participó activamente na Güelgona. Nel so casu, la despidida ta programa pa mañana a les 13 hores nel tanatoriu de Sama.

Na imaxe, Sirgo. Semeya propiedá de Comisiones Obreres d'Asturies.