Tomé va presentar una enmienda a los Presupuestos pa impulsar a los creadores mozos

PP y VOX anuncien una enmienda total a les cuentes presentaes pol Gobiernu.

La diputada de Podemos, Cova Tomé, aconceyó ayeri n'Avilés xunto colos miembros del so equipu, Laura Tuero y Xune Elipe, con profesionales de la industria cultural. En concreto viéronse con Xicu Ariza, espertu na materia; Lía Fernández Lugilde y Rodrigo Agüeria, del coleutivu Lluces (Asociación de Creadores Audiovisuales Independientes d'Asturies); y Elisabeth Montequín 'Eli', panderetera de 6 Riales y de L’Enguedeyu.

"Ye urxente camudar el paradigma na xestión cultural n'Asturies", apuntó nel Centru Niemeyer llueu del alcuentru Tomé, qu'avanzó la presentación d'una enmienda al proyeutu de llei de Presupuestos Xenerales pal 2024 p'habilitar una partida de 300.000 euros pa la dotación d'una llinia d'ayudes a los y les moces creadores menores de 35 años. Pa la valdesana les primeres llinies a abordar nesta materia son la recuperación de la Conseyería de Cultura, la creación de l'Axencia Asturiana de les Industries Culturales y Creatives, la ellaboración d'un Plan Estratéxicu de la Cultura Asturiana, l'afitamientu d'una industria cultural n'Asturies y l'aprobación d'una Llei d'Industries Culturales y Creatives.

Sobre dichu cambiu especificó que tamién requier "sofitu económicu" pal sector. Podemos, que sofita les cuentes en global, recuerda que "nun son los presupuestos que presentaríamos nosotres" y espera consiguir "dalgún ameyoramientu" al traviés del procesu d'enmiendes parciales.

"Hai un texíu mui potente. Lo fundamental ye facer ver a los representantes políticos qu'eso pue convertise nun nichu de crecimiento económicu y creación de puestos de trabayu”, declaró a la salida Elipe, que participó nel aconceyamientu como profesional del sector.

"A min prúyeme qu'un nenu o una nena, asturianos, nun sepan lo que ye una pandereta. Y lo triste ye que los hai", espresó Montequín, mentes qu'Ariza llamó la atención sobre les "polítiques desfasaes" que tán poniéndose en práutica n'Asturies. "Apostar por esta industria ye fundamental pa retener población mozo", rescampló'l responsable de Musicasturiana.com.

Per parte de Lluces, los sos dos representantes señalaron que "vemos qu'hai un caldu de cultivu en forma de creadores que nun tien respuesta per parte de l'Alministración, y esto lleva a la precariedá y al exiliu a munchos de nosotros".

El Plenu, mañana

L'alderique de totalidá del proyeutu de llei de Presupuestos Xenerales pal 2024 va tener llugar mañana na Xunta Xeneral a partir de les 9.30 hores. Presentaron enmiendes de totalidá PP y VOX, que nun va salir alantre al contar les cuentes col apoyu de los partíos del Gobiernu, FSA y Convocatoria por Asturies, y Podemos, y anunciar Foro la so decisión de siguir cola negociación pa "incluyir polítiques qu'ameyoren la vida de los asturianos".

Na semeya, Ariza intervién na xunta celebrada nel Niemeyer énte l'atenta mirada –de derecha a izquierda– d'Elipe, Tuero, Tomé, Fernández Lugilde, Agüeria y Montequín.