Galicia ye'l rival de la seleición asturiana UEFA

Asturies va xugar como llocal, en campu entovía por confirmar, el miércoles 31 de xineru.

Galicia, que clasificó a la fase intermedia de la Copa de Rexones UEFA por sortéu al empatar a tou como segunda meyor segunda con Catalunya, pero actual campeona absoluta llueu de ganar a Belgráu esti xunu en Vilagarcía de Arousa por 3-1, ye'l rival de la seleición asturiana nesta eliminatoria a partíu únicu. El combináu del territoriu vecín taba encuadráu nun grupu xunto con Aragón y Canarias.

La bola de la Real Federación de Fútbol del Principáu d'Asturies foi la primera que salió ente los primeros clasificaos, lo que-y aseguraba'l factor cancha, cola opción como contrincantes de Castilla-La Mancha y Galicia. Finalmente son los gallegos los que van desplazase a Asturies pa enfrentase colos de Clemente Sánchez el 31 de xineru.

El restu d'eliminatories son Cantabria-Castilla-La Mancha, Aragón-Comunidá de Madrid y Andalucía-La Rioja. Los que pasen la ronda van disputar depués una final a cuatro en marzu de la que sal el billete pa xugar la fase europea la temporada siguiente.

Na imaxe, once titular que derrotó a Euskadi 2-0 nel Nuevu Nalón na fase de grupos. Semeya propiedá de la Real Federación de Fútbol del Principáu d'Asturies.