Obres nel llar social de l'ALLA treslladen al Arqueolóxicu la final de la Olimpiada Escolar

Xesús González Rato lleva'l primer premiu del Certame d’Investigación na estaya de propuestes de terminoloxía especializada.

A les 10.30 hores de mañana van arrancar les finales de la Olimpiada Escolar Urbano Rodríguez, el concursu de redaición qu'entama, en dos categoríes, l'Academia de la Llingua Asturiana (ALLA) y nel que tomaron parte más de 150 persones. Na de Primaria clasificaron Sonia Martínez y Wiam Ezzairi, del CP Maestro Casanova de Cangas del Narcea; Ana Menéndez y Lola Álvarez, del CP San Cloyo; y Eidur Riaño y María Montserrat Fernández, del Maurista Auseva d'Uviéu.

Mentes, van acudir a la gran cita de Secundaria y Bachilleratu los escolinos Emma Varela y Xune Artime, del IES Candás; Aitana Carcedo y Gada Casielles, del IES Santa Bárbara de La Felguera; Martín Peña, del IES Cristo del Socorro de Lluanco; Jimena Canga y Xabela Titos, del IES Bernaldo de Quirós de Mieres; Román García y Tomás Moro, del IES Juan José Calvo Miguel de Sotrondio; y Candela Fernández y Mario Vergara, del IES Ramón Areces de Grau. Toos ellos van facer les sos redaiciones, a partir d'un tema propuestu nesi mesmu momentu, nel Muséu Arqueolóxicu d'Asturies al tar n'obres el llar social de l'ALLA.

Como premiu, amás, van poder facer una visita guiada pela instalación museística. Los vencedores van danse a conocer sobre les 13 hores nel salón d'actos, momentu nel que González Rato va recibir tamién el reconocimientu pol so trabayu 'Anovamientu y ampliación de términos médicos', ganador na estaya de propuestes de terminoloxía especializada del Certame d'Investigación, destináu a xente adulto.

Na imaxe, un momentu de la primer fase de la Olimpiada Escolar, celebrada'l 17 de payares.