Les árees sanitaries de Xixón, Avilés y Uviéu camuden la xerencia

El SESPA noma a María Luisa Sánchez Núñez, Miguel Javier Rodríguez Gómez y Beatriz López Muñiz, de manera respeutiva, como responsables nuevos.

Cambios al frente de la xerencia de les trés árees sanitaries con mayor númberu de pacientes, esto ye, Xixón (V), Avilés (III) y Uviéu (IV). Llueu d'una convocatoria pública que supón la primera fase de la renovación de la estructura descentralizada del Serviciu de Salú del Principáu d'Asturies (SESPA), al que se presentaron 52 candidatos, cubriéronse 10 puestos direutivos del sistema sanitariu.

El Boletín Oficial del Principáu d'Asturies (BOPA) de güei recueye estos nomamientos. Nel casu de Xixón, la xerente nueva ye Sánchez Núñez, hasta agora subdireutora d'Atención Sanitaria y Salú Pública de l'área sanitaria IV, en sustitución de Yolanda López Mínguez.

N'Avilés, que tenía al frente a Ricardo de Dios, ocupa la xerencia'l cántabru Rodríguez Gómez, inspeutor médicu na Conseyería de Sanidá de Cantabria, departamentu del que foi titular del 2019 al 2022, y n'Uviéu López Muñiz, venceyada a la direición d'Asistencia Sanitaria del SESPA, abandonando asina'l cargu Beatriz López Ponga. Hai que recordar que los xerentes salientes de Xixón y Uviéu accedieron al cargu nel mes d'abril y qu'estos cambios lleguen pola reforma que toca a toles direiciones de les ocho árees sanitaries entamada cola entrada d'Aquilino Alonso nel SESPA.

Na semeya, Sánchez Núñez, Rodríguez Gómez y López Muñiz.