Alumnos de 14 centros reciben talleres sobre medios y redes sociales

Periodistes pónenlos en castellanu en cursos de terceru y cuartu de la ESO y primeru y segundu de Bachilleratu, y la idea de la Conseyería d'Educación ye amplialos a más institutos.

Cerca de 1.200 estudiantes de catorce centros, doce públicos y dos concertaos, tán participando nunos talleres práuticos de comunicación impartíos por profesionales cualificaos de l'Asociación de la Prensa de Oviedo que lleven el nome de 'Aprendamos a entender los medios de comunicación y las redes sociales'. El so oxetivu ye averar el llabor periodísticu a la mocedá dende una perspeutiva divulgativa y educativa, y trensmitir a alumnes y alumnos la importancia del periodismu na sociedá actual, amás d'ayudalos a distinguir la información contrastada de les noticies falses y buscar fontes fiables.

La duración de los mesmos ye de cuatro hores y cuenten con una orientación práutica. "La idea que tenemos dende la nuesa conseyería ye que cada vez participen más con nosotros y esta propuesta medre a lo llargo de la llexislatura y lleguemos a munchos más centros", apuntó Lydia Espina, responsable d'Educación, que visitó esta mañana el taller impartíu nel IES Avelina Cerra de Ribeseya.

Na semeya, el periodista César Andrino imparte'l taller, con Espina sentada na primer filera siguiendo les esplicaciones xunto a Ceferino Vallina, preidente de l'Asociación de la Prensa de Oviedo.