Esixen a Moriyón la destitución del presidente de Divertia llueu de negar la esistencia del asturianu

“Ye inalmisible qu’un cargu públicu faiga declaraciones como éstes, yá que suponen l’afitamientu de la discriminación de la ciudadanía falante d’asturianu, asina como un ataque a un patrimoniu cultural protexíu”, afirma Iniciativa pol Asturianu. Esta organización demanda a l’alcaldesa de Xixón, Carmen Moriyón, que “destituya de forma inmediata al presidente de Divertia”, l'edil non adscritu Óliver Suárez Rubio.

Nuna entrevista espublizada ayeri pol diariu ‘El Comercio’, l’ex conceyal de VOX y responsable de la empresa municipal que xestiona los Festexos, el Teatru Xovellanos o'l FICX, respondía a una entruga sobre si diga programar “a artistes que promocionen l’usu del asturianu” que “nun me gustaría que s’utilizaran les actuaciones musicales, por exemplu, pa tratar de promocionar una llingua que nun esiste”. Tamién fala d’una supuesta “falta d’ufierta” pa xustificar una reducción d’actuaciones venceyaes al asturianu y apunta, sobre si nel so programa tien espaciu eventos n’asturianu, que “trabayaré mano a mano colos programadores de los principales eventos, y daré la mio opinión pero non siempre impondré’l mio criteriu”.

Nun tardaron n’apaecer reaiciones a les pallabres de Suárez Rubio. Iniciativa pol Asturianu asoleyaba un comunicáu nel que reclama “a Carmen Moriyón la destitución del presidente de Divertia tres negar la esistencia del asturianu”.

Pidi a la presidenta de Foro que “esclarie si caltién la confianza nun conceyal negacionista del asturianu que defende acciones discriminatories contra l’usu del idioma”. Tamién demanda al PP, “como sociu del gobiernu local, un posicionamientu claru énte esta discriminación pa col asturianu y los artistes qu’usen esta llingua nes sos creaciones”.

“La ciudadanía de Xixón nun merez un tratu humildante al so patrimoniu llingüísticu como’l que vienen sintiendo nestos meses caberos per parte de miembros del gobiernu lideráu por Carmen Moriyón”, fina la nota Iniciativa pol Asturianu, que recuerda que la llingua asturiana ye un patrimoniu cultural protexíu “pol Estatutu d’Autonomía d’Asturies, la Ordenanza de Normalización Llingüística de Xixón y, por supuestu, la Constitución española”.