'Tiempu d'escoria' de Xosé Nel Riesgo, meyor llibru del 2022 pa la Tertulia Malory

El gallardón consisten nuna ilustración d'Alfonso Zapico y una medaya conmemorativa.

La Tertulia Malory, que vien aconceyando nel Pub Malory de L'Entregu dende'l 1998, entrega dende'l 2012 un reconocimientu al meyor llibru espublizáu n'asturianu l'añu anterior. Nesta ocasión l'escoyíu pol xuráu del premiu foi 'Tiempu d'escoria' de Xosé Nel Riesgo.

Ésti tuvo formáu polos escritores Xulio Arbesú, José Luis Rendueles, Solinca Turbón, Roberto Corte, Aique Fernandi, Beatriz Quintana Coro, David Fernán, Chechu García y Henrique G. Facuriella, que fallaron el gallardón nun actu celebráu pola tertulia lliteraria'l sábadu, decisión dada a conocer ayeri. L'acta rescampla de la obra de Riesgo cómo "dende los güeyos d’un neñu y con una narrativa mui áxil, l’autor constrúi un testimoniu, en forma de crónica, de la vida nes barriaes del Avilés industrial de los años setenta del sieglu XX, al empar que ye quien a emocionanos col procuru y fondura colos que recuerda la figura materna".

D'igual forma, valora la gran calidá de la producción lliteraria n’asturianu del añu 2022, lo que fixo que la decisión de premiar la novela de Riesgo se garrara por mayoría depués d’una votación bien encesa. L'autor avilesín va recibir el premiu nun actu públicu en L'Entregu en fecha por confirmar.

'Tiempu de escoria', editada por Trabe, ye la quinta novela del escritor nacíu nel 1963, llicenciáu en Xeografía y máster n'Historia y Análisis Sociocultural pola Universidá d'Uviéu. Entantes espublizara 'El cai nunca duerme' (1988), 'Parque temáticu' (2005), 'Escrito na ceniza' (2007) y 'Venti negrinos' (2014).

Nunca se repitió ganador

Nesti tiempu la Tertulia Malory reconoció a doce autores poles sos obres, ensin repetir nunca ganador. Xabiero Cayarga nel 2012, con ‘La neve del cuquiellu’ (2011), foi'l primeru, al que-y siguieron Ruma Barbero, con ‘La Chelita’ (2012); Milio Rodríguez Cueto, con ‘Carne de melandru’ (2013); Consuelo Vega, con 'Más espeso que l'agua' (2014); Ángeles Carbajal, con 'L'aire ente la rama' (2015); Francisco 'Paco' Álvarez, con 'Lluvia d'agostu' (2016); y Raquel F. Menéndez, con 'El llibru póstumu de Sherezade' (2017); David Artime, con 'Incorrectos' (2018); Antón García, con ‘Memoria de Tuña’ (2019); Xuan Bello, con ‘Les isles inciertes’ (2020); y Xulio Viejo, con 'Onde’l caos se texe y se destexe' (2021).

Con esti gallardón los fundadores quieren prestixar les lletres asturianes, al tiempu que se da difusión a les obres que, a criteriu del xuráu, se consideren los meyores llibros escritos cada añu n’asturianu.

Na semeya, Riesgo, nel centru, na presentación de 'Tiempu d'escoria' celebrada n'agostu, introducida por Xuan Pandiella, nel puestu d'Iniciativa pol Asturianu na Feria Internacional de Muestres d'Asturies (FIDMA).