Trés conferencies y una presentación, nel segundu día de les XLI Xornaes Internacionales d'Estudiu de l'ALLA

La institución académica recibe na Facultá de Filosofía y Lletres de la Universidá d'Uviéu a espertos que presenten investigaciones sobre la llingua y lliteratura asturianes.

El segundu de los trés díes que conformen les XLI Xornaes Internacionales d’Estudiu va ufrir a los asistentes trés conferencies y una presentación. La sesión va principiar a les 16 hores cola participación de Wendy Elvira-García, de la Universitat de Barcelona, que va falar de la ‘Comparacion acústica de los sistemas vocálicos del asturiano y el español de Asturias en hablantes bilingües’, y va siguir con Toribio Fuente, de la Universidá d’Uviéu, va afondar na ‘La hidrotoponimia leonesa: los nombres de los ríos, arroyos y otros cursos de agua’.

Llueu d'una posa, a les 18.20 hores, van presentase les novedaes editoriales de la Secretaría Llingüística del Navia-Eo de l’ALLA. Por último, va pesllar el día Pascual Riesco, de la Universida de Sevilla, cola intervención ‘Encuentro de lenguas en la toponimia menor del siglo XVI en los confines de Senabria’.

Mañana tornes les comunicaciones

Les XLI Xornaes Internacionales d'Estudiu arrancaron ayeri con interesantes esposiciones precedíes pola inauguración oficial cola presencia del presidente de l'Academia de la Llingua Asturiana (ALLA), el vicerrector de Xestión Académica de la Universidá d’Uviéu, José Miguel Arias, y el decanu de la Facultá de Filosofía y Lletres, Francisco Martín Miguel, y la presentación de los númberos 129 de ‘Lletres Asturianes’ y 13 de ‘Ciencies. Cartafueyos Asturianos de Ciencia y Teunoloxía’, y van finar mañana con otres dos conferencies y cuatro comunicaciones. Avelino Corral, de la Universidad Autónoma de Madrid, va abrir l’actividá a les 16 hores cola ponencia ‘Estudiu comparativu del suxuntivu n’asturianu y castellán', mentes que la segunda, última de les xornaes, va ponela Pedro Riesco, de la Universidá d’Uviéu, a les 18.20 hores baxo'l nome de ‘El reló, la campana y el tirotéu. Notes semántiques, pragmátiques y sociollingüístiques sobre’l verbu ‘sentir’’.

Les comunicaciones, a partir de les 17 hores, son ‘Análisis de la xurisprudencia sobra la llingua asturiana’, por Nicolás Bartolomé; ‘De ‘por embargu’ a ‘sin embargu’, origen lingüístico de dos marcadores discursivos en asturiano y castellano’, por Emilio Fernández Viejo; ‘‘Mando que yo den’: una contribución al estudiu de los pronomes personales del asturianu medieval’, por Clara Elena Prieto; y ‘Plurillingüismu nel ‘Vocabulario de las palabras y frases bables...’’, por Darío de Dios. L’accesu a toles actividaes de les Xornaes Internacionales d’Estudiu ye llibre hasta completar aforu, con preferencia pa los matriculaos.

Na semeya, l'austriacu Franz Rainer, qu'ayeri punxo la primer conferencia de les Xornaes Internacionales d'Estudiu, entitulada ‘El desarrollo de los sufijos latinos -ĬCIUS e -ĪCIUS en las lenguas románicas’.