Arroes, Candanal y Pion, preparaes pa recibir el XXXIV Premiu al Pueblu Exemplar d'Asturies

La Fundación entrega'l día enantes los XLIII Premios Princesa de Asturias nel Campoamor, teatru frente al que dellos coleutivos convoquen un añu más una concentración de protesta.

A les 11.30 hores de mañana ta prevista qu'entame l'actu institucional d'entrega del XXXIV Premiu al Pueblu Exemplar d'Asturies, qu'esti añu se reparten trés parroquies de Villaviciosa. Son Arroes, Candana y Pion, poblaciones con topónimos asturianos, únicos oficiales, que la Fundación Princesa de Asturias, organización qu'asoleya les bases d'esti gallardón n'asturianu, gallego-asturiano y castellanu, vien respetando en tou momentu magar que la mayor parte de los medios de comunicación asturianos vienen emplegando'l derogáu 'Peón'.

Los reis d'España, la princesa Leonor y la infanta Sofía van desplazase al llugar dende Uviéu pa participar nesti eventu, qu'inclúi un percorríu que va arrancar n'Arroes pa depués dirixise al Valle de Pion, con visita tamién al Centru d'Intelixencia Territorial y Teunoloxíes pal Mediu Rural (CTIC Ruraltech). Pa finar, va entamase una xinta n'Arroes, onde ta instalada una carpa.

La xornada previa, esta tarde a les 18.30 hores, va celebrase nel Campoamor la ceremonia d'entrega de los XLIII Premios Princesa de Asturias. Los gallardonaos esti añu son Meryl Streep (Artes); Nuccio Ordine (Comunicación y Humanidaes); Hélène Carrère d'Encausse (Ciencies Sociales); Eliud Kipchoge (Deportes); Haruki Murakami (Lletres); Drugs for Neglected Diseases Initiative (Cooperación Internacional); Jeffrey Gordon, E. Peter Greenberg y Bonnie L. Bassler (Investigación Científica y Téunica); y Mary's Meals (Concordia).

Concentración na Escandalera

Delles organizaciones sociales y polítiques, como Asturies Insumisa, van participar nuna concentración contra la monarquía española convocada a les 17 hores na Escandalera. Na mesma va dase visibilidá y sofitu a dellos conflictos llaborales.

Al empar, dende les 17.30 hores, la Corriente Sindical d'Izquierda (CSI) llama a apoyar al pueblu palestín nesi mesmu llugar.

Na imaxe, escenariu nel que se celebró l'actu d'entrega del Premiu al Pueblu Exemplar d'Asturies a Cadavéu, onde se respeta la toponimia asturiana, única oficial.