Aína celebra'l Día Internacional de les Muyeres Rurales con un actu "pa emponderar les vides reales"

Va consistir nuna mesa redonda entitulada 'Ensin fronteres: feminismu y ruralidá. Vides reales' y va tener llugar nel uvieín Llar La Llegra.

El 15 d'ochobre ta marcáu como'l Día Internacional de les Muyeres Rurales y, coincidiendo cola cercanía d'esa fecha, la estaya de Feminismu y Derechos Sociales d'Aína entama un actu "pa emponderar les vides reales" y "pa celebrar y reivindicar a toles muyeres rurales del nuestru país y tamién a les de tol mundu". Ésti va tener llugar mañana a les 20 hores, depués de la concentración na Escandalera, prevista a les 17 hores, con motivu de la entrega de los Premios Princesa de Asturias.

Isabel A. Fernández va encargase de conducir un alderique pal que tán convidaes la ganadera Lena Sarasúa y la terapeuta social guatemaliana Sara Álvarez Medrano, del pueblu maya k’iche’. Nel actu va falase "de la situación y la historia de les muyeres rurales n’Asturies y n’América Llatina pa poner en común idees y vivencies que nos afecten a toes".

"Dende Aína creemos qu’hai que da-y más valir al trabayu que les muyeres faen nel nuestru entornu rural, invisibilizáu sobre manera. Amás, ye perimportante mirar más allá les nuestres fronteres, conocer otres maneres de vivir, con dinámiques y tiempos distintos, pues supón un arriquecimientu cultural y hai muyeres d’otros países trabayando nel nuestru rural", espresen.