Iniciativa treslladó a Gutiérrez propuestes sobre normalización pa desendolcar esta llexislatura

Ana Vanessa Gutiérrez recibió a Iván Llera, presidente d’Iniciativa pol Asturianu, aconceyamientu nel que trataron diferentes cuestiones sobre la situación del idioma. La organización treslladó a la viceconseyera de Cultura, Política Llingüística y Deporte diferentes propuestes pa esta llexislatura, poniendo’l focu na necesidá d’un Plan de Normalización.

La so aprobación ye ún de los compromisos del Gobiernu y asina quedó reflexáu nel alcuerdu de gobiernu con Convocatoria por Asturies. Pa Iniciativa pol Asturianu ha ser una “ferramienta pa organizar, ordenar y facer siguimientu” de les polítiques que se pongan en marcha nestos cuatro años.

Nun foi l’únicu tema que se trató nel aconceyamientu celebráu la selmana pasada. Llera propunxo a Gutiérrez la reformulación del Conseyu Asesor de Política Llingüística pa convertilu nun órganu de participación menos burocráticu que garantice la presencia de les entidaes y coleutivos que trabayen na defensa del patrimoniu llingüísticu.

Nel terrén de l’Alministración Pública, señalóse la puesta a disposición de la ciudadanía formularios n’asturianu y gallego-asturiano, y la rotulación billingüe d’edificios, espacios y vehículos. Tamién la puesta en marcha d’un plan de sensibilización y formación del funcionariáu con ventayes llaborales pol deprendimientu o ameyoramientu del nivel llingüísticu, que permita l’aplicación efectiva de la llexislación nesta materia y la valoración del conocimientu d’asturianu como méritu n’oposiciones y procesos de selección de personal.

Mentes, na estaya d’Educación, calcó na necesidá de garantizar la ufierta de les asignatures de Llingua Asturiana y Gallego-asturiano en toles etapes educatives y en tolos centros asegurando la so voluntariedá ensin competir con otres optatives. Tamién incidió na reformulación de la campaña de matriculación nes asignatures pa facela más efeutiva asina como la renovación progresiva de los cartelos de los centros educativos pa que’l paisaxe llingüísticu de los centros tea tamién n’asturianu.

Pa garantizar l’enseñu de la materia de Llingua Asturiana y Lliteratura, la entidá reclamó’l reconocimientu de la especialidá docente d’asturianu y l’ampliación de places del máster del profesoráu d’Educación Secundaria. Nel casu de l’acreitación del conocimientu d’asturianu, Llera plantegó la posibilidá de dar accesu a la certificación equivalente al B2 d’asturianu al alumnáu que curse l’asignatura en tola etapa educativa.

La organización plantegó tamién la creación d’un Grau de Filoloxía Asturiana na Universidá d’Uviéu, l’establecimientu d’ayudes y premios a la realización de TFG, TFM y tesis n’asturianu y la creación d’un programa de formación del profesoráu. Asinamesmo, afaló a potenciar el Día de les Ciencies Asturianes col asturianu como llingua vehicular

Presencia en RTPA y normalización al traviés del deporte

La organización tamién insistió na importancia de los medios de comunicación de titularidá pública nes polítiques de normalización llingüística y la tresmisión xeneracional. Llera destacó la necesidá de desendolcar el mandatu-marcu, documentu qu’acumula cuasi una década d’atrasu y qu’habría recoyer el mandatu de la RTPA de normalizar les llingües propies y fixar un incrementu progresivu y ambiciosu de los conteníos nestes llingües.

Nesi sen, la organización propunxo como midíes más inmediates a curtiu y mediu plazu la conversión de RPA nuna emisora dafechu n’asturianu y gallego-asturiano y la ellaboración d’un manual d’estilu qu’estableza l’usu de la toponimia tradicional de forma prioritaria tanto na espresión oral como per escrito en tolos programes y soportes de RTPA. Por último, aprovechando les competencies de la viceconseyería, Iniciativa pol Asturianu propunxo amás un esfuerciu y un apartáu de normalización específicu pa deportes pola visibilidá que tien na sociedá.