Dixebra y Mala Reputación van tocar nel Pravia Rock Fest

Def Con Dos y El Drogas son los cabeza de cartelu d'un certame dividíu en dos xornaes nel que tamién participen Fe de Ratas y Crudo.

Agones, un llugar mui recordáu polos rockeros asturianos por acoyer del 2004 al 2010 el yá desapaecíu Derrame Rock, va axuntar güei y mañana a un bon númberu d'aficionaos a esti xéneru. Nuna carpa instalada nel recintu deportivu va celebrase'l Pravia Rock Fest con presencia de nomes mui destacaos de la escena estatal.

Dixebra va participar nesta primer cita a les 21.45 hores, que va pesllar Def Con Dos y la so xira 'Mutantes pal pueblo' polos 30 años de la película 'Acción mutante' y del so discu 'Armas pal pueblo'. Enantes, van pasar pel escenariu Crudo (19.30 hores) y Fe de Ratas (20.30 hores).

El Drogas va finar mañana en Pravia la so xira con cantares de Barricada polos 40 años de la primer actuación del grupu. Va ser a les 22.30 hores, depués de Cobardes (19.30 hores) y Mala Reputación (22.30 hores), que tamiéu ufre'l so conciertu últimu de los sos 25 años, y enantes de The Lizards (00.35 hores).

Les entraes pal Pravia Rock Fest, que va facilitar un espaciu d'acampada de baldre, tienen un preciu de 22 euros per día y de 35, les dos xornaes. Al escosase les físiques, namái queden a la venta per Internet.

Na semeya, trabayos d'instalación de la carpa que va acoyer al públicu asistente al Pravia Rock Fest.